O metal galego perdeu un 16 % do emprego no primeiro semestre pola crise da Covid

Asime apunta a unha recuperación a partir do segundo semestre de 2021 e pide cooperación para optar a fondos da UE

Enrique Mallón, secretario xeral de Asime, na presentación dos datos do Metal galego no primeiro semestre de 2020.

O sector metalúrxico galego, que engloba actividades como a automoción, o naval, a aeronática ou as estruturas metálicas, pechou o primeiro semestre do ano con cifras “moi negativas” polo impacto da crise sanitaria do COVID-19, cunha perda do 16 por cento do emprego e unha caída do 22 por cento da facturación.

Así se recolle no balance semestral presentado este venres pola Asociación de Industrias do Metal e Tecnoloxías Asociadas de Galicia (Asime), no que se detalla que este sector chegou a metade do ano 2020 con 55.600 empregos e unha facturación de 5.300 millóns de euros.

A actividade do metal galego supón, en termos xerais, un 41 % das exportacións de Galicia e a actividade máis destacada é, dentro do propio sector, a construción de automóbiles (cun 70 por cento do total de exportacións da industria metalúrxica. A crise sanitaria reduciu tamén as cifras da balanza comercial do metal: unha caída do 12 por cento das exportacións e unha caída do 27 por cento das importacións.

AUTOMOCIÓN E NAVAL

Por actividades, a automoción (incluído tamén o transporte e o metal-mecánica) perdeu un 25 % dos empregos, e a súa facturación, de algo máis de 3.000 millóns de euros no primeiro semestre, esborrallouse un 30 por cento.

AERONÁUTICA E OUTRAS ACTIVIDADES

A aeronáutica galega tamén sufriu de forma notable na primeira metade do ano, cun descenso acusado da actividade das aerolíneas, e perdeu un 13 por cento do emprego (quedou con 1.087 traballadores) e un 14 por cento da facturación (ata os 67 millóns de euros). A súa actividade exportadora, con todo, disparouse e creceu un 121 por cento.

REFLEXIÓNS

Á vista destes datos, o secretario xeral de Asime, Enrique Mallón, recoñeceu que o primeiro semestre foi “negativo ou moi negativo” para o sector, pero apuntou que a industria metalúrxica galega está capacitada para reactivar a súa fortaleza, e sinalou o horizonte da segunda metade de 2021 para a recuperación.

Mentres esa recuperación concrétase, apostou por manter a cooperación entre empresas e administración, pediu que se alonguen os préstamos ICO (e unha nova moratorio para o pago), reformar e mellorar os plans de formación e facer fronte común para optar ás axudas do fondo europeo de reconstrución económica.