O procesado de máis de 2.300 probas de COVID realizadas a persoal da Universidade de Vigo concluíu sen casos positivos, segundo comunicou á institución académica o servizo de Microbioloxía do Hospital Álvaro Cunqueiro.
O tratamento das mostras de saliva fíxose segundo o sistema de procesado agrupado (‘pooling’) e, aínda que se rexistraron mínimas incidencias (por falta de líquido e outros erros na recollida de saliva), o resultado definitivo, que será comunicado aos membros da comunidade universitaria a partir da próxima semana, confirmou que non hai casos entre o persoal.
No entanto, o servizo de Microbioloxía do Álvaro Cunqueiro lembrou que a non detección “non exclúe completamente a infección polo coronavirus”, polo que deben manterse de forma estrita as medidas preventivas decretadas polas autoridades sanitarias. A proba realizada non é diagnóstica, polo que se algunha das persoas que a fixo nota síntomas, debe acudir ao seu centro sanitario de referencia.
En total, 2.303 traballadores e traballadores participaron neste cribado (un 80 por cento das persoas convocadas): 1.538 no campus de Vigo, 441 no de Ourense, e 324 no de Pontevedra.
Por outra banda, en próximos días iniciarase a realización de 200 PCR aleatorias por semana, centradas principalmente no alumnado. Aínda que sexan aleatorios, este test poderían concentrarse nalgún centro se as circunstancias así o recomendan por detectarse algún caso.