Detido en Vigo despois de ser sorprendido cunha gran cantidade de papelinas de cocaína

O detido, un home de 46 anos, contaba xa con 36 antecedentes.

Cocaína e outras drogas / Photopin

Un home de 46 anos domiciliado en Vigo foi detido por un suposto delito de tráfico de drogas tras ser sorprendido na cidade cunha gran cantidade de papelinas de cocaína que se dispuña a vender.

A investigación iniciouse o pasado mes de xullo despois de que a Policía Nacional tivese coñecemento da posible existencia dun punto negro de venda de drogas no barrio de Coia, segundo detallaron fontes do corpo.

Mediante as investigacións realizadas, os axentes comprobaron que a trasfega de toxicómanos era constante nas rúas Lalín e Estrada, así como nas súas inmediacións. Tamén observaron que os compradores esperaban en puntos determinados da zona por un home co que realizaban un rápido intercambio despois do que abandonaban o lugar.

Dado que este home adoptaba distintas medidas de seguridade e tiña un especial coidado cando contactaba cos seus clientes, estableceuse un dispositivo policial na zona.

Así, os axentes dispostos nas inmediacións observaron a este home cando chegaba ao lugar para realizar varias vendas e identificárono. Mediante un cacheo preventivo de seguridade, interviñéronlle unha gran cantidade de papelinas de cocaína.

Posteriormente, foi detido e trasladado a dependencias policiais, onde se lle tomou declaración e comprobouse que lle constaban 36 antecedentes. Finalmente, este home foi posto a disposición do Xulgado de Instrución número 3 de Vigo.