O Tribunal Superior de Xustiza de Galicia (TSXG) ditou outra sentenza, a segunda, na que se desestima un recurso do Concello de Vigo e ratifica a nulidade do decreto municipal que suspende os descansos dos bombeiros da cidade.
Esta é a segunda resolución do alto tribunal galego neste sentido, xa que foron dous os sindicatos (CUT e CIG) que denunciaron nos tribunais ese decreto municipal. Por iso, o xulgado do contencioso administrativo número 1 de Vigo ditou dúas sentenzas, nas que declarou nulo devandito decreto.
O Concello de Vigo presentou recurso contra ambas as sentenzas e, tras coñecerse unha primeira desestimación (a correspondente á denuncia feita pola CIG), este venres fíxose pública a segunda sentenza do TSXG, que volve rexeitar as alegacións presentadas polo consistorio.
O TSXG, do mesmo xeito que xa fixera na sentenza precedente, sinala que a resolución do xulgado contencioso administrativo de Vigo non é contraria a dereito e a proba foi valorada de forma correcta. Así mesmo, insiste en que o decreto municipal recorrido (de febreiro de 2019), non especifica que a suspensión de descanso sexa unha medida temporal e que o propio contencioso administrativo detalla a vulneración de varias normas relativas á negociación deste tipo de medidas, aos tempos de traballo ou á prevención de riscos laborais.
O alto tribunal galego volve apuntar que “non se cuestiona a necesidade do Concello de Vigo de dotar de efectivos” o servizo, ata completar os 20 mínimos establecidos, pero “o que non é correcto (…) é que se proceda sen máis a autorizar ao xefe de servizo de maneira xenérica a suspender os descansos do persoal”.
O servizo de bombeiros de Vigo está en folga indefinida desde agosto do ano pasado, en demanda de máis persoal e de solucións para que poidan levar a cabo o seu traballo con garantías.
Ademais destas dúas sentenzas ratificando a nulidade do decreto de suspensión de descansos, os xulgados tamén fallaron a favor dos bombeiros cando estes recorreron o decreto de servizos mínimos establecido con motivo da folga. Nese caso, o xulgado declarouno nulo porque, entre outras cuestións, eses servizos mínimos coinciden cos ordinarios, o que “baleira de contido” o exercicio dun dereito fundamental, como é a folga.