A CIG remarca que a adquisición de Vulcano debe levar un proxecto “estable” para recuperar a actividade naval

O vigués José Alberto Barreras presentou a única oferta pola unidade produtiva do estaleiro por 7,85 millóns de euros.

Vulcano / © Miguel Núñez.

A CIG-Industria de Vigo remarcou que a adquisición do estaleiro Factorías Vulcano, que se atopa en proceso de liquidación, debe levar un proxecto industrial “estable” que permita recuperar a actividade naval nas súas instalacións de Teis.

Así se pronunciou o sindicato despois de que a empresa Marina Meridional, propiedade do vigués José Alberto Barreras, presentase a única oferta pola unidade produtiva do estaleiro por 7,85 millóns de euros. O prazo de presentación de ofertas polo estaleiro finalizou este luns, aínda que a adxudicación permanece pendente.

Posteriormente, o Xulgado do Mercantil número 3 de Pontevedra, con sede en Vigo, remitirá a oferta á administración concursal de Vulcano, tras o que se analizará para comprobar se se axusta ao plan de liquidación, aprobado xudicialmente. En caso afirmativo, Marina Meridional será a adxudicataria.

Ante esta situación, o secretario de CIG-Industria en Vigo, Xulio Fernández, remarcou que o naval representa un sector “estratéxico” para a cidade do que forma parte este estaleiro e “un dos alicerces económicos da comarca”.

Por iso, ao seu xuízo, este sector debeu ser “apoiado e fomentado” pola Xunta “como parte do tecido industrial”. No entanto, Xulio Fernández criticou o “deixamento” mostrado polo Goberno galego respecto diso, xa que “non apoiou este proxecto industrial e deixouno morrer”.

Ante esta situación, a central sindical resaltou que a adquisición de Vulcano por un investidor privado debe levar “unha solución estable e duradeira para recuperar a actividade naval”.

Do mesmo xeito, o sindicato recalcou que, se se adxudica Vulcano ao único ofertante, deberanse facer públicos o plan de negocio e o proxecto industrial do investidor, así como os “motivos” polos que se acepta a súa proposta.

Así mesmo, a CIG volveu demandar que a Autoridade Portuaria de Vigo “desista de modificar a concesión de dominio público” das instalacións, que, en opinión do sindicato, resulta “imprescindible para manter a actividade do estaleiro”.

Fernández asegurou que, se se cumpren estes requisitos, “a central sindical apoiará calquera actividade que desenvolva un proxecto industrial para a comarca e que garanta os postos de traballo”.

Ademais, acusou o presidente do Porto, Enrique López Veiga, de “boicotear proxectos que si poderían manter a actividade industrial” e esperou que “cambie de actitude”.