O investigador da Universidade de Vigo (UVigo) Mateo Ramos avogou por impulsar a rastrexabilidade de produtos alimentarios e sanitarios que poidan resultar perigosos no marco da súa tese de doutoramento.
Segundo precisou nun comunicado a universidade, a proposta contempla unha aposta pola Rastrexabilidade Difusa ou Fuzzy Traceability, que permite coñecer por onde circulou un produto e os axentes que puideron actuar sobre del.
En concreto, a aplicación de técnicas de rastrexabilidade pode resultar importante para garantir a seguridade de medicamentos ou produtos alimentarios. Neste sentido, a combinación de algoritmos matemáticos e técnicas de intelixencia artificial pode pemitir predicir situacións futuras, estudar o ciclo de vida dun produto e alertar sobre situacións de risco.
O investigador lembrou que, en ocasións, se atopan listeria e escherichia coli en alimentos. Ante esta situación, remarcou que a Rastrexabilidade Difusa permite pescudar que lle puido ocorrer aos alimentos nos que se rexistraron as bacterias mediante un algoritmo que calcula os escenarios posibles e mostra o máis probable.
Nesta liña, na tese apóstase polo desenvolvemento de mecanismos que permitan abordar as casuísticas e problemáticas identificadas de acordo coa información dispoñible e os formatos nos que se presenta. A ese respecto, Ramos indicou que se busca que estes mecanismos suplan “as carencias xeradas polos déficits de información presentes nos contextos analizados”.
