O Concello de Vigo outorgará a Medalla da cidade, o seu máximo recoñecemento institucional, ao colectivo de profesionais sanitarios, en recoñecemento ao seu traballo, especialmente durante a pandemia de coronavirus, cando “arriscaron a súa vida”.
Así o anunciou en rolda de prensa o alcalde, Abel Caballero, que este luns participou nunha concentración da persoal da área sanitaria para mostrales o seu “apoio” e agradecer a súa “inconmensurable tarefa”, antes de lembrar que a gala de entrega desta Medalla, xunto ao recoñecemento aos Vigueses Distinguidos, foi posposta ata xullo. “Estamos en débeda con eles”, proclamou.
Os profesionais da sanidade recollerán a Medalla xunto a quen foron elixidos como acredores do galardón de Vigueses Distinguidos: a presentadora Carlota Corredera, o centro de educación especial Saladino Cortizo, o maxistrado xubilado Xullo Picatoste, o IES Castelao, o club Pena Trevinca e o axente de Policía Nacional Iván Álvarez (ferido durante os disturbios en Cataluña).
Non é a primeira vez que o goberno local de Abel Caballero ten un xesto cara aos traballadores da sanidade pública no marco dos recoñecementos que cada ano entrega con motivo da festividade da Reconquista. Na edición de 2018, foron recoñecidos como Vigueses Distinguidos os xefes de Atención Primaria que presentaron a súa dimisión para denunciar a falta de recursos.
Tras o anuncio feito polo alcalde, o grupo municipal do PP sinalou que, aínda que os sanitarios merecen “máis que nunca” a medalla, “tamén é xusto recoñecer o esforzo do mundo social, representado en Cáritas”, e apuntou que ambos os recoñecementos son “compatibles”.