Axentes da Policía Local de Vigo, en colaboración con efectivos da Policía Nacional, detiveron a un home de 49 anos de idade, M.A.R.F. e de orixe alemá, como presunto autor dun delito de violencia de xénero, por agredir e ameazar á súa parella, en presenza do fillo menor dela, de 2 anos de idade.
Segundo informaron fontes policiais, os feitos ocorreron nun domicilio da rúa Travesía de Vigo, onde acudiu unha dotación do 092 tras recibir unha chamada telefónica que alertaba dunha rifa familiar e da posibilidade de que un dos implicados portase unha arma branca.
Cando chegaron ao lugar, o presunto autor da agresión estaba a abandonar o edificio, pero foi interceptado por axentes da Policía Nacional, mentres que efectivos da Policía Local subiron á vivenda para entrevistarse coa vítima.
A muller, que se estaba co seu fillo, explicou que ela e a súa parella iniciaran unha discusión nun local e que ela optou por irse. Inicialmente, refuxiouse en casa dun veciño pero, cando volveu ao seu domicilio e a súa parella chegou, comezou unha nova rifa, no trancurso da cal, o presunto agresor tiroulle comida á cara e suxeitouna fortemente do pescozo.
A muller entrou en pánico e comezou a gritar pedindo axuda, o que alertou aos veciños e provocou que a súa parella abandonase o domicilio a fume de carozo.
Ademais, a vítima asegurou que tiña medo porque eran “habituais” eses episodios violentos, e trasladou aos axentes a súa intención de interpor denuncia. Por estes feitos, o presunto agresor foi detido.
VULNERA ORDE DE AFASTAMENTO DA SÚA NAI
Axentes da Policía Local de Vigo detiveron este xoves a un mozo de 24 de idade, S.M.V.G., como presunto autor dun delito de quebrantamento de condena, por vulnerar unha orde de afastamento da súa nai. Dáse a circunstancia de que o mozo xa fora interceptado ese mesmo día pola mañá e tamén foi detido fai menos dunha semana, polo mesmo motivo.
Segundo informaron fontes policiais, este mozo foi sorprendido ao mediodía do xoves nunha terraza dunha cafetaría na zona de Gran Vía, sentado xunto á súa nai, a pesar de ter en vigor unha orde que lle impide achegarse a menos de 500 da muller e do domicilio dela, polo que foi detido.
A última hora da tarde, a Policía volveu sorprendelo, esta vez a uns 150 metros do domicilio da súa nai. Nese caso, o 092 localizouno cando camiñaba pola rúa Teixugueiras e chamou a atención dos axentes porque mantiña unha actitude esquiva, tratando de ocultar o seu rostro.
Cando os axentes se achegaron, comprobaron que se trataba do mesmo mozo que fora detido pola mañá e que, de novo, estaba a vulnerar a orde de afastamento, polo que foi detido e trasladado á Comisaría de Policía Nacional para a súa posta a disposición xudicial.
Este home xa foi detido, polo mesmo motivo, o pasado luns. Nesa ocasión, ao decatarse da presenza dos axentes, o mozo tratou de fuxir e escondeuse baixo unhas escaleiras duns patios interiores na Avenida da Florida, aínda que foi localizado e arrestado.
