As aeroliñas que operan en Peinador cargan contra AENA: “Non podemos cumprir cos pasaxeiros”

A Asociación de Compañías Españolas de Transporte Aéreo (ACETA) e a Asociación de Liñas Aéreas (ALA) emitiron un comunicado no que lamentan que as obras do ILS do aeroporto vigués de Peinador están a ocasionar problemas que lles impiden operar as súas programacións con normalidade e "cumprir os compromisos" cos seus pasaxeiros.

Aeroporto de Peinador
Espera na terminal diante dun avion de Iberia/ Miguel Nuñez

A Asociación de Compañías Españolas de Transporte Aéreo (ACETA) e a Asociación de Liñas Aéreas (ALA) emitiron un comunicado no que lamentan que as obras do ILS do aeroporto vigués de Peinador están a ocasionar problemas que lles impiden operar as súas programacións con normalidade e “cumprir os compromisos” cos seus pasaxeiros.

As aeroliñas denunciaron o “gran número de incidentes” que están “a soportar” desde que AENA desconectou o pasado 7 de maio ese sistema de axuda á navegación para substituílo por outro (máis dun centenar de voos desviados ou cancelados, e miles de viaxeiros afectados).

A pesar de que recoñecen o “esforzo” de AENA por axilizar os traballos e ter o cambio terminado uns días antes do previsto, as compañías quixeron puntualizar que o funcionamento das instalacións aeroportuarias e as obras que se realizan “dependen directa e exclusivamente de AENA”, polo que a xestión “non só está fóra do control das aerolíneas, senón que, ademais, afecta de cheo ás obrigacións das compañías aéreas”, que se ven “impedidas” para cumprir as súas previsións.

“A pesar de ser causas externas á nosa xestión, tentamos paliar en todo o posible os inconvenientes que sofren os nosos clientes, pero debemos insistir en que non temos ningunha capacidade de xestión nas incidencias que se producen no aeroporto de Vigo“, remarcaron.