Tres anos de cárcere para un acusado de vender droga nun bar de Vigo

O TSXG desestimou o recurso presentado polo acusado.

A Sala do Civil e Penal do Tribunal Superior de Xustiza de Galicia (TSXG) desestimou o recurso presentado por un acusado dun delito de tráfico de drogas e confirmou a condena imposta de 3 anos de prisión, segundo informaron fontes xudiciais.

A Audiencia Provincial de Pontevedra condenou, en abril de 2019, a este home e a dúas mulleres por un delito contra a saúde pública, por vender cocaína polo miúdo nun bar da rúa Fontáns, en Vigo. Así, impuxo ao home a condena de 3 anos de prisión e multa de 165 euros; mentres que as mulleres foron sentenciadas a dous anos e un ano de cárcere respectivamente.

A defensa do home presentou recurso de apelación para que se lle aplicase un subtipo penal atenuado, pero o alto tribunal galego desestimouno e confirmou a condena do tribunal provincial.