A Xunta asegurou que Vigo estará “moi presente en todos os seus sectores estratéxicos” no Plan de Reactivación e Dinamización de Galicia, que permitirá o desenvolvemento de distintos plans sectoriais, dado que esta cidade exerce como “tractor económico” na comunidade.
Así se pronunciou nun comunicado o Goberno galego despois de que o alcalde da urbe olívica, Abel Caballero, criticase a súa falta de implicación na reconstrución da cidade e afirmase que o seu proxecto representaba un “anuncio baleiro de contido”.
Neste sentido, o Executivo autonómico reprobou que o rexedor recoñecese que descoñece a formulación, pero avanzase “que non haberá actuacións en Vigo”. Así, a Xunta lembrou que este plan permitirá dar resposta a necesidades de autónomos, pemes e empresas afectadas pola crise sanitaria, así como a sectores estratéxicos, polo que afirmou que “centos de empresas e traballadores vigueses” beneficiaranse do mesmo.
Así mesmo, o Goberno galego detallou que os departamentos avanzarán os plans sectoriais a partir do proxecto. “A partir de aquí van vir as distintas actuacións sectoriais, pero na Xunta sempre empezamos a casa polos cimentos, non polo tellado. As improvisacións deixámosllas a outros”, remarcou.
Deste xeito, indicado que, en primeiro lugar, determinaranse os recursos dispoñibles “para poder actuar con eficacia e sen improvisacións”. A ese repecto, destacou que se destinarán 3.000 millóns de euros, dos cales 1.700 millóns serán achegados pola Xunta de Galicia e outros 1.300 polo sector privado, a esta iniciativa.