Marea de Vigo tacha de “chapuza de libro” a prórroga da concesión do bus a Vitrasa

Non descarta acudir á "vía xudicial" se se constata que esa prórroga vulnera a norma e vai en contra do interese xeral dos cidadáns.

Vitrasa preto do hospital Alvaro Cunqueiro © Miguel Núñez

O grupo municipal Marea de Vigo cualificou este martes como unha “chapuza de libro” a decisión do goberno de Abel Caballero de prorrogar durante 5 anos a concesión do servizo de bus urbano, que presta a empresa Vitrasa (do grupo Avanza), e advertiu de que non descarta acudir á “vía xudicial” se se constata que esa prórroga vulnera a norma e vai en contra do interese xeral dos cidadáns.

Nunha rolda de prensa, o portavoz do grupo, Rubén Pérez, avanzou que Marea “está a avaliar a seguridade xurídica” desa decisión, que supón unha marcha atrás con respecto a un acordo de goberno adoptado a finais de 2018 (a denuncia do contrato para evitar a prórroga, xustificada polo propio alcalde para redactar un novo prego e ter un transporte acorde aos novos tempos, xa que o actual contrato data de 1.994).

Desde o punto de vista político, o portavoz de Marea sinalou que, tras coñecerse esa decisión, quedou de manifesto que “aquí quen manda no transporte é Vitrasa, non o alcalde, que está cativo de determinadas decisións”, como a ampliación de liñas, a renovación de frota ou a implantación do cartón PassVigo.

Segundo lembrou, o principal condicionante do contrato con Vitrasa é a amortización pendente de 13 millóns de euros por certos investimentos en medios e terreos, e sinalou que é “perfectamente asumible” para un concello como o de Vigo, facer esa amortización e “quedar coa frota e as instalacións”.

Dese modo, e co mesmo argumento utilizado para decidir a prórroga (a situación de crise xerada pola pandemia de COVID), poderíase ter un transporte municipal xestionado integramente desde o público. “Teriamos unha empresa cento por cento pública, sería perfectamente asumible, con cargo a remanentes ou superávit”, incidiu Rubén Pérez.