O regreso de persoas maiores ás residencias DomusVi de Vigo e Cangas completarase este sábado

Este luns trasladouse a todos os residentes de Barreiro á súa residencia de orixe.

Traslado de anciáns á Residencia do Tempo Libre de Patos pola crise do coronavirus / © Miguel Núñez.

A Xunta completará este sábado o traslado de persoas maiores usuarias das residencias DomusVi de Barreiro, en Vigo, e DomusVi de Aldán, en Cangas  de regreso ás mesmas.

Fontes do Goberno galego detallaron que este luns se trasladou a todos os residentes de Barreiro á súa residencia de orixe. Posteriormente, os usuarios do centro de Aldán regresarán ao mesmo este sábado.

En concreto, permanecían nas instalacións da Residencia de Tempo Libre de Patos, en Nigrán, nove usuarios da residencia viguesa e 10 do centro de Aldán. Así, estas persoas foran trasladadas ás instalacións de tempo libre tras rexistrarse varios casos de coronavirus nos seus centros de orixe e comprobarse que non se atopaban infectadas.

Durante a pandemia, interviñéronse tres residencias en Galicia. Precisamente, dúas delas foron as instalacións de DomusVi en Aldán e Barreiro, mentres o terceiro centro foi o xeriátrico Nosa Señora de Fátima, situado no Barco de Valdeorras (Ourense).

Así mesmo, o número de persoas afectadas por COVID-19 nas residencias de maiores de Galicia mantense sen cambios e suma 19 usuarios e 15 traballadores, segundo os datos facilitados este luns pola Consellería de Política Social, que tamén confirmou que non hai cambios nos centros de atención a discapacitados (un usuario e tres traballadores con coronavirus).