A oposición cualifica de “escandalosa” a prórroga da concesión de bus por parte do Concello

O PP vigués ve "sospeitoso" ese cambio de criterio, ao considerar que se usa a crise da COVID como "escusa" para non facer unha nova concesión.

Vitrasa preto do hospital Alvaro Cunqueiro © Miguel Núñez

Todos os grupos da oposición no Concello de Vigo arremeteron este venres contra o goberno local e contra o alcalde, Abel Caballero, tras confirmarse a decisión de prorrogar, por 5 anos máis, a concesión do servizo de bus urbano á empresa Vitrasa, do Grupo Avanza, unha prórroga que tacharon de “escandalosa”, á vez que denunciaron que, para materializala, púxose “como escusa” a situación xerada pola pandemia de coronavirus.

Así, o portavoz do PP, Alfonso Marnotes, lamentou que o alcalde “se burla de todos os vigueses” por asinar esa ampliación meses despois de anunciar que se sacaría a concurso o servizo para adaptalo aos novos tempos (o contrato en vigor data de 1994). “O servizo seguirá sendo anticuado e precario (…) e sen posibilidade de mellora polo menos durante 5 anos”, constatou.

O edil ‘popular’ ve “sospeitoso” ese cambio de criterio, ao considerar que se usa a crise da COVID como “escusa” para non facer unha nova concesión, e advertiu de que esa prórroga non elimina a posibilidade de que a empresa, que aplicou un ERTE aos seus traballadores, reclame compensación polas perdas durante o estado de alarma.

Pola súa banda, o portavoz de Marea de Vigo, Rubén Pérez, tamén criticou que se acuda á crise sanitaria como explicación para non convocar un novo concurso porque, “curiosamente, a COVID non foi escusa para paralizar a tramitación da PXOM ou outros procesos administrativos“.

“Pero si é escusa para darlle 5 anos máis de concesión ao Grupo Avanza”, subliñou, e constatou que o alcalde incumpriu ” a súa palabra” e permitirá que, durante 5 anos máis, os veciños teñan un bus co billete “máis caro” das grandes cidades, e cun contrato “obsoleto”.

Segundo Rubén Pérez, “non hai motivos nin políticos nin administrativos” que xustifiquen a prórroga, e é “unha sinvergüencería” non aclarar que hai detrás desa decisión, “nun momento en que hai que repensar a mobilidade”.

“HIPOTECAR” A CIDADE E ASEGURAR O “LUCRO” DUNHA EMPRESA

Finalmente, o concelleiro do BNG, Xabier Pérez Igrexas, tachou de “absoluto escándalo” a prórroga, cando Abel Caballero “prometeu hai meses que ía acometerse unha remodelación integral do servizo”. “Agora iso quedou en nada, e hipoteca a cidade durante 5 anos, condenando aos veciños a seguir padecendo un servizo con escasas frecuencias, un mapa de liñas obsoleto e que non está á altura”, advertiu, e engadiu: “Agora di que de modernizar nada, el está para asegurar o lucro e o negocio a unha empresa privada”.

Así mesmo, Pérez Igrexas ve “ofensivo” que o alcalde utilice como argumento as indemnizacións polas perdas económicas da concesionaria derivadas da crise sanitaria. A ese respecto, lembrou que, como presidente da FEMP, Caballero reclamou ao Goberno de España un fondo de 1.725 millóns para que os concellos poidan precisamente paliar as perdas no transporte público.