O alcalde de Vigo e presidente da Federación Española de Municipios e Provincias (FEMP), Abel Caballero, apostou este martes porque sexa o propio Goberno central, “cos concellos á beira”, o que xestione o ingreso mínimo vital, sen “chanzos intermedios”.
Así o trasladou a preguntas dos medios nunha rolda de prensa na que proclamou que “é bo que o xestione quen o paga”, xunto con aquelas administracións máis próximas aos cidadáns, que son os concellos.
Abel Caballero subliñou que a aprobación dese ingreso mínimo vital “é unha decisión histórica no país“, que “varre a pobreza extrema”, e púxoa á altura doutras decisións de calado social adoptadas por gobernos socialistas, e que teñen que ver coas pensións, a sanidade pública ou a dependencia.
Con todo, recoñeceu que lle “preocupa” que, en Galicia, sexa a Xunta a que xestione esa axuda. “Preocúpame que a Xunta reclame unha competencia que non é súa e que non financia, e acabará facendo que a tramiten os concellos, que acabaremos pagando unha parte do proceso”, sinalou o rexedor olívico.
Segundo Caballero, o ingreso mínimo vital “teno que xestionar o Goberno, calquera que sexa a súa cor política, cos concellos á beira”. “Esa é a forma máis directa, non perdamos isto en chanzos intermedios por poder político. Feijóo non quere mellor funcionamento, quere poder político, e aos feitos me remito: o diñeiro para políticas sociais pola pandemia non se repartiu entre os concellos de Galicia”, sentenciou.
A ese respecto, insistiu en que “calquera intermediación” na xestión do ingreso mínimo vital “será mala para os cidadáns que o reciben”. “Estamos ante unha batalla política dalgunhas comunidades autonómas, que están a pensar máis no poder político que nas necesidades da xente”, resolveu.
