A Xunta de Galicia lamentou este mércores que Adif “non concreta” a firma da ‘addenda’ ao convenio entre a administración central, a autonómica e o Concello de Vigo para a construción dos accesos ao novo complexo intermodal de Urzáiz, o que suporá que a finalización da estación non estará lista ata 2022.
Así o trasladou o goberno galego tras a reunión mantida pola comisión de seguimento dos traballos, na que, afirmou, os representantes do administrador de infraestruturas ferroviarias persisten na “incerteza” sobre a ‘addenda’ e sobre a execución dos accesos.
A ese respecto, volveron a reclamar que se formalice “canto antes” o acordo para o cofinanciamento desas obras, tras constatar que, aínda que o Concello olívico pediu que se asine a ‘addenda’ en xuño, Adif “non confirmou” ningunha data.
A Xunta lembrou que tanto a administración autonómica como a municipal xa aprobaron ese trámite en febreiro pasado, e que mesmo o Concello anunciara a adxudicación dos traballos para marzo, un paso que non se puido dar porque o Goberno central mantén “bloqueadas” as obras.
Así as cousas, o goberno galego lamentou que, “con moita probabilidade”, a finalización dos traballos da estación de Urzáiz non se producirá ata 2022, e non en abril de 2021 como estaba previsto.
Por iso, pediu que se estuden “alternativas técnicas que permitan acurtar os prazos das obras e minimizar afeccións”, e lembrou que a súa achega para o complexo intermodal de Vigo é duns 18 millóns de euros.
