O Hospital Vithas Vigo converteuse este martes no primeiro centro da cidade olívica sen pacientes de COVID-19, despois de que o último deles -que ingresou o 6 de abril- recibise a confirmación de dúas PCR negativas.
Segundo explicou o centro nun comunicado, no momento máis crítico da pandemia, o hospital chegou a atender 21 pacientes e ata catro ingresados en UCI ao mesmo tempo. Dous pacientes, con patoloxías previas, faleceron.
O Hospital Vithas Vigo notificou o primeiro paciente con COVID-19 o pasado 10 de marzo. Desde ese día, fóronse establecendo protocolos de seguridade para traballadores e o resto de usuarios, que se manterán activos ante a previsión de que aparezan novos casos.
En total, este centro vigués realizou probas PCR a preto de 300 pacientes. Todos os pacientes que foron curados recibiron a súa alta médica despois de dúas PCR seguidas con resultado negativo.