Caballero censura que o PSOE pacte con Bildu para derrogar “algúns puntos” da reforma laboral

Valora "moitísimo" os acordos con Ciudadanos e sinala que o PP "se volveu irrelevante" no debate para a quinta prórroga do estado de alarma.

Abel Caballero, alcalde de Vigo e presidente da FEMP, nunha rolda de prensa telemática.. CONCELLO DE VIGO

O presidente da Federación Española de Municipios e Provincias (FEMP) e alcalde de Vigo, Abel Caballero, mostrou este xoves a súa desconformidade con que o PSOE pacte con Bildu para a derrogación dalgúns puntos da reforma laboral de 2012. “Con Bildu, nin sequera bos días”, advertiu.

Nunha entrevista na Sexta, recollida por Europa Press, Caballero sinalou o “erro” que houbo co primeiro texto do pacto, no que se acordaba a derrogación “íntegra” da reforma laboral do PP. “Houbo un erro. Recoñeceuno o PSOE rectificando o texto. Nós queremos que se derroguen determinadas partes das ordenanzas laborais. Foron moi daniñas”, explicou, para despois aclarar que o Goberno tamén acordou manter “unha parte moi importante” da actual lexislación laboral.

Así, o alcalde de Vigo destacou que “nesa liña estaba a ir o diálogo social” entre os sindicatos e a patronal e que o PSOE, a través do ministro de Transportes e secretario de Organización do partido, José Luís Ábalos, xa aclarou este xoves que a formulación “non era a derrogación total”.

Neste sentido, criticou que se chegue a acordos con Bildu. “Con Bildu, nin sequera bos días”, resolveu Caballero, quen tamén insistiu en que coa formación vasca “non hai nada que facer”.

Neste contexto, celebrou os acordos con Ciudadanos e sinalou que o PP “se volveu irrelevante” no debate para a quinta prórroga do estado de alarma porque, ao seu xuízo, parece que “non xoga ningún papel neste país”. “Valoro moitísimo o acordo con Ciudadanos. É unha senda estupenda, gústame que haxa un acordo con Cs, con Podemos e que se amplíe o marco do consenso no escenario político español”, sostivo.

Respecto de Bildu, o dirixente ‘socialista’ apuntou que é “distinto” coincidir en votacións que alcanzar pactos coa formación. “O que non pode ser é que cando Bildu vote a favor do PSOE é malo, pero canto vota en posicións como o PP é bo. Iso non pode ser. A vara de medir ten que ser igual para todos”, protestou.

O PSOE e Unidas Podemos anunciaron este mércores un pacto con EH Bildu no que aprobaba derrogar “de maneira íntegra” a reforma laboral de 2012, co compromiso de que esta derrogación sexa “efectiva antes da finalización das medidas extraordinarias adoptadas polo Goberno en materia económica e laboral derivadas da crise orixinada pola Covid-19”.

Con todo, a última hora do mércores, o PSOE anunciaba unha matización ao acordo alcanzado con EH Bildu na que non aparece a palabra “integramente” e os cambios a realizar de maneira urxente limítanse unicamente a tres puntos.