Detido en Vigo tras saltarse un control, atropelar a un axente e dar positivo no test de drogas

Os feitos tiveron lugar na tarde do sábado, cando varias unidades do 092 estaban a participar nun control de vehículos na zona de Castrelos.

092
Policía Municipal / © Miguel Núñez.

Axentes da Policía Local de Vigo detiveron a un veciño da cidade, C.I.R., de 41 anos de idade, como autor dun delito contra a seguridade viaria e outro de atentado contra axente da autoridade, despois de saltarse un control, atropelar a un policía e dar positivo no test de drogas.

Segundo informaron fontes policiais, os feitos tiveron lugar na tarde do sábado, cando varias unidades do 092 estaban a participar nun control de vehículos na zona de Castrelos.

Os axentes deron o alto a un condutor que, unha vez á altura do funcionario, acelerou a marcha e emprendeu a fuxida. Uns metros máis adiante foi interceptado por outra dotación policial, que estaba advertida do ocorrido.

Un policía interpúxose na traxectoria do coche para obrigalo a parar, pero o condutor realizou un xiro brusco e meteuse polo Camiño Telleira. Nese viario atopábase outro axente, que tentou bloquear o paso do coche sospeitoso.

O condutor freou bruscamente a marcha e, a continuación, volveu acelerar atropelando o policía (e causándolle feridas nunha perna), que caeu sobre o capó do vehículo e tivo que moverse ao carón para tirarse ao chan e evitar lesións maiores, porque o coche seguía a súa marcha.

Tras dar a voz de alarma, estableceuse un dispositivo de procura do coche, que foi localizado a uns 5 quilómetros do lugar dos feitos. Nese momento o condutor volveu novamente a tentar darse á fuga, aínda que puido ser interceptado.

Cando os axentes o sacaron do interior do vehículo, o condutor arroxou ao chan un cigarro leado, que resultou conter sustancias estupefacientes. De feito, o home deu positivo por THC no test indiciario de drogas e, por todo iso, foi detido.