O alcalde de Vigo, Abel Caballero, mantivo este mércores a primeira reunión co comité de expertos que lle asesorá na toma de decisións con respecto á ‘desescalada’ nas medidas de restrición implantadas pola pandemia de coronavirus.
Segundo trasladou o rexedor, a principal recomendación que fixeron os expertos é manter o distanciamento social e unha boa hixiene de mans. “É o principal plantexamento que fan, e ter moita precaución, porque isto dista moito de estar acabado”, afirmou Caballero, que lembrou que outra das prevencións que deben tomarse é manter á poboación máis vulnerable apartada de posibles riscos de contaxio.
O alcalde tamén explicou que, entre as cuestións abordadas, están os ámbitos de aplicación da ‘desescalada’ e asegurou que os expertos sosteñen que “o mellor” ámbito para iniciala “é a provincia” e, a partir de aí, e cando as condicións o permitan, pasar aos municipios.
O comité de expertos que asesoran ao rexedor olívico está formado por 15 persoas: do ámbito da Sanidade están presentes os médicos Cayetano Rodríguez (exsecretario xeral do Sergas e exconcejal socialista), Luciano Garnelo (pediatra e un dos xefes de servizo que dimitiu o ano pasado), Roberto Díez Pascual, Isidro Lago (xinecólogo e presidente do Colexio oficial de Médicos de Pontevedra), Enrique Igrexas (supervisor de Cardiología do Hospital Álvaro Cunqueiro), Xullo Cabrera (xubilado), Fernando Bica (xubilado) e Merchi Castro (xubilada).
Do ámbito da investigación, forman parte do comité a catedrática de Inmunología da UVigo, África González; a directora do Instituto Oceanográfico de Vigo, María Vitoria Bicada; e a catedrática de Economía Aplicada da UVigo, Coral do Río.
Completan o comité varios responsables de servizo do Concello de Vigo: José Luís Díez Montero (médico do servizo de saúde), Dino Otero Failde (Medio Ambiente), Carmen Pintado (Transportes), Carla Candía (Desenvolvemento Local e Emprego), María José Loureiro (Educación), e Manuel Monroy (enxeñeiro do departamento de Tráfico).
