Usuarios do Porto de Vigo piden “medidas de maior calado” para non “afogar” o sector

López Veiga afirma que a terminal olívica non ten "capacidade normativa" para aplicar esas rebaixas.

A Federación de Usuarios do Porto de Vigo reuniuse de forma telemática este venres para abordar o impacto da crise sanitaria do coronavirus e reclamou “medidas de maior calado”, xa que consideran que as rebaixas de taxas expostas por Portos do Estado son “insuficientes”.

Así, consideran que a modificación de taxas de ocupación ata un 20 por cento, ou a rebaixa da taxa de buques, deben aplicarse “con efecto retroactivo desde a declaración do estado de alarma”, e pediron tamén rebaixas nas taxas para a pesca fresca e as mercadorías.

A ese respecto, esixiron á Autoridade Portuaria de Vigo “que defenda os intereses do sector ante Portos do Estado”, algo que é “a súa responsabilidade”, e lembraron que as empresas “se están xogando a súa viabilidade”, sendo ademais, sector “clave” na economía.

A Federación sinalou que a lei de Portos do Estado contempla a posible modificación das concesións por causa de forza maior, e entende que “debera ser aplicada agora con maior calado e flexibilidade, dadas as excepcionais circunstancias”.

Por outra, denunciaron que “moitas empresas pagaron xa por adiantado as taxas correspondentes ao primeiro semestre de ano”, polo que, se se acorda unha redución, se debe “devolver” a parte proporcional.

En todo caso, insistiron en que “a simple redución de taxas ou moratorias son insuficientes” e necesítanse medidas “de máis envergadura”, como condonacións ou exencións “para non afogar un sector que nestes momentos se atopa nunha delicada situación”.

RESPOSTA DO PORTO

Pola súa banda, o presidente da Autoridade Portuaria, Enrique López Veiga, asegurou este venres nunha rolda de prensa telemática, celebrada despois da reunión do Consello de Administración do Porto, que o porto “non ten capacidade normativa” para aprobar esas rebaixas.

Segundo indicou, o réxime económico dos portos de interese xeral está regulado por lei e só se pode modificar por parte do Goberno. A ese respecto, sinalou que xa se aprobaron rebaixas de taxas, pero advertiu de que “non son rebaixas de carácter xeral”.

Así, precisou, a empresa que queira acollerse a esas bonificacións debe solicitalo e demostrar que a caída da súa actividade se debe á crise sanitaria.