Un total de 1.100 persoas foron citadas este venres en centros de saúde da área de Vigo para someterse ao test de inmunidade do coronavirus, no marco do estudo estatístico que está a levar a cabo a Consellería de Sanidade.
Segundo trasladaron fontes do Sergas, esta primeira fase de estudo estenderase ata o 5 de maio e, catro semanas despois, ao longo doutra semana, levará a cabo a segunda fase.
En total, nos 18 centros Covid de Atención Primaria da área de Vigo realizaranse probas a 9.475 persoas elixidas aleatoriamente entre os titulares de cartón sanitario polo Instituto Galego de Estatística (IGE), co fin de coñecer a prevalencia da inmunidade fronte ao COVID-19 na poboación galega.
Cada centro de saúde ten asignada unha poboación concreta, coa que se contacta telefonicamente para facer unha breve enquisa. Así, esas persoas son citadas para que acudan ao seu centro de Atención Primaria e, no caso de que non poidan desprazarse, un equipo acudirá ao seu domicilio.
TOMA DE MOSTRAS
A proba consiste na toma dunha mostra mediante unha punción dixital. Ao introducir a mostra nun medio reactivo, revelarase se esa persoa tivo contacto ou non co virus.
O resultado das probas será comunicado polo médico de familia que, en caso necesario, dará as indicacións clínicas pertinentes. Todos os datos quedarán reflectidos na historia clínica do paciente.
A xerencia do CHUVI lembrou que esta investigación “repercutirá dun modo beneficioso en toda a comunidade, xa que os resultados achegarán un maior coñecemento da epidemia“. O estudo permitirá coñecer a incidencia do coronavirus de acordo con variables de sexo, idade, ou área territorial; adoptar as medidas sanitarias máis adecuadas para a ‘desescalada’ do confinamento; programar “o regreso á normalidade” e “anticiparse ante a posibilidade de novos contaxios potenciais”.
En Galicia faranse 50.925 test na primeira fase de estudo, e o mesmo número na segunda fase. A mostra de participantes fíxose con tres subgrupos por diferenzas de idade: menores de 19 anos, entre 19 e 64 e maiores de 64 anos, co fin de contar cos resultados da circulación na poboación infanto-xuvenil, na adulta e na terceira idade.