InicioEconomíaPorto de Vigo avisa que abril "non vai ser bo" pola crise...

Porto de Vigo avisa que abril “non vai ser bo” pola crise que xa freou o tráfico marítimo

O organismo prevé iniciar no verán a reforma do paseo que se afundiu durante un concerto de Ou Marisquiño 2018

PUBLICADO O

Os efectos da pandemia de coronavirus e da crise sanitaria global xa empezaron a notarse no Porto de Vigo, cuxo informe de xestión correspondente ao mes de marzo xa reflicte, a partir da segunda quincena, efectos como o descenso de tráfico ro-ro (automóbiles).

Así o trasladou o presidente da Autoridade Portuaria, Enrique López Veiga, nunha rolda de prensa telemática, ao termo da reunión do Consello de Administración do Porto.

Segundo informou, desde mediados de marzo reflíctese a paralización do tráfico ro-ro na terminal de Bouzas, do mesmo xeito que a paralización dos tráficos da autoestrada do mar. No informe do mes pasado, no entanto, evidénciase un aumento na mercadoría xeral e en tráfico de colectores, mentres que a pesca fresca “comportouse ben”. “O parón de Citroën está a notarse moitísimo”, lamentou.

Con respecto ás previsións, López Veiga avanzou que “o mes de abril non vai ser bo” e o porto será “duramente golpeado” en actividades como o tráfico de cruceiros. Así mesmo, constatou unha importante caída no tráfico de ría, debido ao confinamento e á paralización de actividade en moitas empresas.

López Veiga indicou que o informe de xestión sinala que as cifras de marzo e as acumuladas son “positivas”, pero este “quizá sexa o último mes en que podamos sorrir”, e sinalou tamén que se formularon as contas de 2019, que reportan perdas de medio millón de euros, debido a que o Porto tivo que facer unha provisión pola promoción de parcelas a prezo baixo na Plisan.

Esa provisión de perdas débese a que non se venderon todas as parcelas ofertadas. Sen este condicionante, apostilou o presidente portuario, o resultado sería positivo, ao redor de 2,3 millóns de euros.

OBRAS NAS AVENIDAS

Por outra banda, indicou que o Porto prevé iniciar este verán as obras para remodelar a zona das Avenidas que se afundiu durante a celebración dun concerto no Festival Ou Marisquiño de 2018.

A intención é comezar “canto antes” os traballos, cun investimento duns 5 millóns de euros, aproveitando que este verán os espazos non serán ocupados por eventos (tanto O Marisquiño como o VigoSea Fest foron cancelados este ano), e tendo en conta que “xa se extinguiu” o convenio da actuación ‘Abrir Vigo ao Mar’. Para poder acometer esa actuación, o Porto debe modificar o seu plan de investimentos, e contar para iso coa autorización de Portos do Estado.

Segundo incidiu López Veiga, ademais destas obras, o Porto ten previstas outros investimentos, como a de mellora da eficiencia enerxética na lonxa. En total, a Autoridade Portuaria ten dispoñibles “uns 20 millóns de euros” para iniciar traballos en canto acabe o estado de alarma e as tramitacións administrativas permítano.

ÚLTIMAS

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...

Poñen marcha un servizo de aluguer de bicis eléctricas en Vigo, dispoñibles en sete aparcadoiros da cidade

A compañía Welgood puxo en marcha un servizo de aluguer de bicicletas eléctricas en...