A Federación Galega de Asociacións de Usuarias e Familiares de Usuarias de Residencias e da Dependenica REDE vén de presentar ante a Fiscalia Superior de Galicia novas denuncias contra o grupo DomusVi e outras empresas xestoras de residencias polos delitos de denegación de auxilio, abandono, omisión de socorro e imprudencia grave con resultado de morte e lesións, todo iso realizado de forma dolosa.
A través da súa asociada Vellez Digna (asociación de familiares de usuarias de residencias, fundada en Cangas do Morrazo), a Rede pide que se investigue, concretamente, a Josefina Fernández Miguélez, CEO de DomusVi, e ao resto dos propietarios dese grupo, tanto en España, Francia e Inglaterra, así como aos propietarios das demais residencias afectadas pola COVID19 en Galicia. Tamén á totalidade dos directivos do grupo DomuVi e das demais residencias afectadas pola enfermidade que tiveran algo que ver, por acción ou omisión, co denunciado.
“NON SÓ A COVID MATA OS ANCIÁNS”
No documento de denuncia recollen que “non só é a COVID19 a que mata os anciáns” senón que tamén “a imprudencia, o abandono, a neglixencia e a falta de auxilio”. Así mesmo, dende a REDE critican a falta de desinfeccións, limpezas axeitadas e aplicación de medidas adicionais recomendadas por Sanidade, incluso “tras varios días e varios casos de infeccións e cun número crecente de afectados en residencias”.
Lonxe diso, “DomusVi e outras residencias decidiron aforrar cartos“, sentenzan, ao non contratar o servizo de empresas de limpeza e ao actuar con “pasividade” ante a expansión do coronavirus. Igualmente, afirman que “tampouco se reforzou o persoal de atención directa”, a pesar de ser “indispensable” para aplicar os protocolos que dende a administración sanitaria se ían recomendando.
“XENOCIDIO DISFRAZADO DE NEGLIXENCIA”
Por todo isto, a Federación considera que nas residencias se está a producir un “auténtico xenocidio disfrazado de neglixencia”: “Estas empresas socio-sanitarias teñen a obriga de velar e coidar dos anciáns e non o están facendo, nin siquera o razoable”, denuncian. Así pois, solicitan que a Fiscalía abra unha investigación e comece a recabar probas sobre o terreo a través da Policía Xudicial para concluír a existencia ou non de delito no proceder dos propietarios das residencias e os seus directivos, así coma do director de cada residencia.
