O alcalde de Vigo renuncia a un 50% do seu salario en abril e os concelleiros do PP doarán o 30% do seu

Aínda que apunta á posibilidade de que máis edís do goberno local se somen a esta iniciativa, Abel Caballero di que pode haber concelleiros que non poidan actuar do mesmo xeito por "necesidades persoais".

O alcalde Abel Caballero / © Miguel Núñez.

O alcalde de Vigo, Abel Caballero, anunciou que renunciará a percibir o 50 por cento do seu salario do mes de abril, mentres que os catro edís do Grupo Municipal do Partido Popular doarán o 30 por cento das súas retribucións deste mes a accións que busquen combater a propagación do coronavirus.

O rexedor explicou que a súa renuncia contribuirá ás arcas municipais. Aínda que apuntou á posibilidade de que máis edís do goberno local se somen a esta iniciativa, insistiu en que pode haber persoas que non poidan actuar do mesmo xeito por “necesidades persoais”. “É unha acción individual de cada un”, remarcou.

Abel Caballero precisou que non percibe retribución como presidente da Federación Española de Municipios e Provincias (Femp).

Ademais, lembrou que, durante a crise económica, en concreto en 2012, o seu salario e o dos concelleiros da corporación se reduciu nun 7,1 por cento, a mesma rebaixa que se aplicou ás retribucións do Goberno central, o rei Juan Carlos I e o entón príncipe Felipe.