O Bloque Nacionalista Galego (BNG) puxo en marcha unha iniciativa de seguimento da crise sanitaria derivada da propagación do coronavirus e dos seus “efectos sociais” en Vigo.
En declaracións remitidas aos medios, o portavoz do BNG na cidade, Xabier P. Igrexas, detallou que este “monitor social” buscará reforzar o contacto da formación cos axentes sociais, os sindicatos e os comités de empresa de modo “permanente”. Así, aspírase a “recoller en tempo real a evolución da situación” e as necesidades derivadas dela.
Deste xeito, o obxectivo do BNG pasa por detectar as áreas que precisan de intervención do goberno local mediante a información proporcionada polos colectivos. Posteriormente, Igrexas indicou que a súa formación trasladará ao comité de seguimento do Covid-19 do Concello estes datos co obxectivo de que poida “tomar as decisións que correspondan”.
Di que o seu obxectivo é realizar unha “radiografía” das consecuencias da crise sanitaria nun momento no que as medidas tomadas polo Goberno –que anunciou que buscará o apoio do Congreso para prorrogar o estado de alarma ata o 11 de abril–“apuntan a que se vai a prolongar”.
