Os concellos costeiros de Vigo, Cangas do Morrazo, Marín e Baiona decretaron entre este domingo –primeiro día do estado de alerta– e este luns o peche das súas praias como medida para previr as aglomeracións e evitar contaxios do novo coronavirus.

Un dos primeiros municipios en adoptar esta decisión foi o de Sanxenxo, que precisamente nos últimos días experimentou un aumento de persoas que se desprazaron desde outros puntos de España para pasar a alerta sanitaria. Por isto mesmo, o Consistorio tivo que apelar o sábado “á responsabilidade” dos seus veciños e “especialmente dos visitantes”.

Este domingo, a cidade de Vigo sumábase a esta iniciativa e, tras unha reunión da comisión local de seguimento do COVID-19, o Concello tomou a decisión de pechar espazos públicos, entre eles o paseo de Samil e todas as praias.

O alcalde, Abel Caballero, explicou este luns que se adoptou esta decisión porque viu “por centos e centos persoas que ían pasear” por estas zonas. “A cuestión non é que con este tempo vaiamos pasear, a cuestión é que quedemos na casa”, dixo, en declaracións aos medios.

BAIONA, CANGAS E MARÍN

Tamén o Concello de Baiona decidiu pechar todos os seus areais “sen excepción” a partir deste luns, tal e como avanzou a Europa Press o alcalde, Carlos Gómez.

O rexedor explica que se trata dunha medida “disuasoria” e “a maiores” doutras como o peche da atención presencial dos servizos municipais. Neste sentido, recalca que non se adopta porque houbese algún problema “fóra do común” nin nas praias nin nos paseos.

En Cangas, o alcalde, Xosé Manuel Pazos, ordenou este luns o peche da praia urbana de Rodeira e doutras situadas en Nerga, Viñó e a zona de Cabo Home. Ademais, o rexedor avanzou que “a idea é ir estendéndoo” a todos os areais do termo municipal.

A colocación de precintos e valos de obra para cortar os accesos a estas áreas súmase á prohibición do aparcadoiro de autocaravanas na liña de costa. E é que, tal e como explicou Pazos a Europa Press, a xente non só se pasou o sábado e o domingo “como un fin de semana calquera”, o que deu lugar a “aglomeracións”, senón que tamén houbo quen optou por pasar o confinamento do estado de alerta na súa autocaravana en lugar de estar nas súas casas.

Ademais, o rexedor denuncia que “hai bastante xente de fóra, fundamentalmente de Madrid” pero tamén “do interior de Galicia”, que decidiu nos últimos días trasladarse ás súas segundas residencias situadas en Cangas.

Tamén na comarca do Morrazo, o Concello de Marín decretou o sábado o peche das baixadas ás praias do municipio en coordinación coa Policía Local, igual que os parques infantís e canchas deportivas ao aire libre, xa que aínda había usuarios nestes espazos.

A CORUÑA E OUTROS MUNICIPIOS COSTEIROS

A pesar de que en Vigo si se adoptou a decisión de pechar os areais, na cidade da Coruña, informan fontes do Consistorio, a maioría da xente “está a respectar” a situación de emerxencia sanitaria.

Por iso, non ven necesario acordoar estas zonas de costa porque xa no propio Real Decreto-Lei do estado de alarma se prohiben á cidadanía os paseos salvo para satisfacer necesidades básicas.

Na provincia de Lugo, o municipio de Viveiro tamén experimentou durante o fin de semana un incremento de visitantes doutras comunidades autónomas. Desde o goberno local, segundo indica a Europa Press a alcaldesa, María Loureiro, xa fixeron un chamamento “para que non viñese ninguén”.

Iso si, a rexedora advirte que os que teñan que desprazarse ao municipio, que o fagan cos “mesmos coidados” que os seus veciños: “Que non saian das súas casas”.

En canto ao peche de espazos públicos, Loureiro indica que o fixeron con parques infantís, instalacións deportivas e espazos culturais, pero aínda non cos areais porque as forzas de seguridade “está a resolvelo ben”. Aínda que de momento “non fai falta” cortar os accesos ás praias, admite que “se hai que facelo, faise”.

Tampouco en Ribeira ven necesario tomar esta medida “porque está bastante controlado” por parte da Policía Local, tal e como asegura o alcalde, Manuel Ruiz.

É a mesma situación que en Burela, onde o sábado si que houbo “concentracións de moita xente para pasear cans” pola costa, pero, tras a entrada en vigor do estado de alarma o domingo, os veciños “están a responder ben”. “Se houbese algún repunte si que habería que pór cinta limitadora nas praias”, avisa o rexedor, Alfredo Llano.