A planta PSA Peugeot Citroën de Vigo opta por manter a súa actividade “mentres a situación, o marco legal e a subministración de pezas o permitan”, pero decide “intensificar a actuación preventiva” fronte ao novo coronavirus.
Despois de que os sindicatos pedisen a paralización da actividade da planta, fontes da dirección lembraron que a declaración do estado de alarma por parte do Goberno “autoriza a continuidade da actividade industrial e os movementos das persoas para acudir ao traballo”.
En vista de que opta por continuar coa produción, PSA asegura que “intensifica a actividade preventiva” a través de “medidas destinadas a asegurar o distanciamento social recomendado” entre os empregados.
Estas solucións, que se concretarán este domingo nunha reunión co comité de empresa, súmanse a outras xa implantadas como o “reforzamento” da limpeza, a “prohibición de viaxes”, os protocolos “para evitar que entren persoas que estivesen en zonas de risco”, ademais doutras recomendacións que “minimicen o risco de contaxio”.
Xa o venres, a dirección da planta de PSA en Vigo propuxo que os empregados poidan utilizar bolsas de horas ou permisos retribuídos, traballar a distancia para coidar os seus fillos ante a suspensión das clases e “todos os mecanismos de flexibilidade dispoñibles”.
No entanto, este sábado o sindicato Central Unitaria de Traballadores (CUT) remitía a Recursos Humanos un escrito no que argumentaba que unha empresa con miles de contactos entre os seus traballadores é “un posible foco de propagación” do coronavirus, polo que piden “non correr o risco” de primar “a produción por encima da saúde”.