Abel Caballero descarta facer a proba do coronavirus a pesar de ter estado varias veces en Madrid

Reuniuse coa ministra de Política Territorial e Función Pública, Carolina Darias (que deu positivo en Covid-19) hai un mes.

Abel Caballero / © Miguel Núñez.

O alcalde de Vigo e presidente da Federación Española de Municipios e Provincias (FEMP), Abel Caballero, descartou someterse a unha proba para descartar unha infección por coronavirus a pesar de que estivo varias veces en Madrid nas últimas semanas e se reuniu coa ministra de Política Territorial e Función Pública, Carolina Darias (que deu positivo en Covid-19), hai un mes.

Así o confirmou nunha rolda de prensa na que sinalou que non se someterá a esa revisión porque o seu último contacto de risco, con Darias, foi hai un mes, e superou un hipotético período de incubación do virus sen ter síntomas.

A ese respecto, o rexedor olívico apuntou que “as probas hai que facelas cando sexa preciso” porque hai “colapso” nos laboratorios que as analizan, e insistiu en que non tivo contacto directo nas últimas dúas semanas con ninguén que estea afectado polo coronavirus.

Abel Caballero reuniuse en Madrid con Carolina Darias o pasado 12 de febreiro, e tamén estivo na capital entre o 2 e o 5 marzo. Nese período mantivo reunións cos ministros de Cultura e de Ciencia, ademais de participar en diversos eventos como presidente da FEMP e nun almorzo informativo protagonizado por Gonzalo Caballero, no que tamén participaron varios membros socialistas do Consello de Ministros.

O rexedor, quen recoñeceu que é unha “persoa exposta” por razón das súas responsabilidades públicas, lembrou que, na actual situación, cínguese ás recomendacións dos sanitarios e evita os saúdos con contacto físico e a proximidade a outras persoas “para dar exemplo”.

O alcalde fixo estas manifestacións nunha rolda de prensa celebrada este venres sen xornalistas, e avanzou que o seu gabinete buscará fórmulas para manter as comparecencias e facilitar a información, a pesar das recomendacións de teletraballo e illamento que tamén afectan os traballadores dos medios.

Para iso, desde o Concello está a traballarse na implementación dun sistema para poder seguir as roldas de prensa do rexedor (que adoita comparecer a diario, ás veces máis en máis dunha ocasión) vía ‘streaming’.