Crean un manual para axentes xudiciais que actúan en casos de violencia de xénero

Esta iniciativa xorde nun momento no que a Xunta de Galicia esixe que os axentes xudiciais que participen en casos de violencia de xénero conten con formación especializada neste ámbito.

Xulgado de Tui / EUROPA PRESS- FÁTIMA SOUTO.

O Colexio de Procuradores de Vigo iniciou a elaboración dun manual para profesionais deste colectivo que interveñan en casos de violencia de xénero.

Segundo trasladou a corporación nun comunicado, este decálogo detallará como se debe tratar as vítimas co obxectivo de completar a formación dos procuradores, así como de incrementar eficacia do acompañamento e o apoio prestados a estas persoas durante o proceso xudicial.

Esta iniciativa xorde nun momento no que a Xunta de Galicia esixe que os axentes xudiciais que participen en casos de violencia de xénero conten con formación especializada neste ámbito.

Así mesmo, o ano pasado, o Colexio de Procuradores de Vigo, en colaboración co Consello Galego de Procuradores, impartiu un curso relacionado co tratamento de casos desta clase a 50 procuradores da cidade.

Os servizos destes profesionais inclúense no protocolo de funcionamento da Oficina de Atención ás Vítimas de Delitos de Xénero desde o inicio do procedemento, o que permite axilizar os trámites previos e limitar as comparecencias das vítimas ante os tribunais.

En concreto, o 5,6 por cento das mulleres que presentaron unha denuncia durante o terceiro trimestre de 2019 en Galicia rexeitaron prestar declaración, unha situación que se adoita achacar ao seu temor ao agresor ou a non ser cridas. Precisamente, o 14,3 por cento das causas procesadas na comunidade entre o 1 de xullo e o 30 de setembro nas que tivo lugar esta situación terminaron sen condena, segundo datos do Consello Xeral do Poder Xudicial (CGPJ).

Ademais, en Vigo, as mulleres representan o 72 por cento dos procuradores, un 5,1 por cento máis que a media nacional, segundo o estudo ‘Datos estatísticos de mulleres en postos directivos en España no sector xurídico’. Adicionalmente, o 70 por cento da xunta de goberno do Colexio de Procuradores de Vigo está formada por mulleres, un 11,1 por cento máis que a media estatal destas corporacións.