Galegas 8M chama a mobilizarse o Día da Muller en Vigo para “cambiar o sistema” e “derrubar o patriarcado”

Reclamarase que se recoñezan os coidados como "un ben social non valorado" e esixiranse responsabilidades sociais e colectivas na protección do territorio e o medioambiente.

Integrantes de Galegas 8M.

O colectivo Galegas 8M chamou a participar na manifestación que percorrerá as rúas de Vigo o próximo 8 de marzo con motivo do Día Internacional da Muller para “cambiar o sistema” e “derrubar o patriarcado”.

Así o avanzaron as integrantes desta plataforma na cidade olívica, onde se detallou que a marcha partirá da rúa Urzáiz ás 18,00 horas, segundo recolleu a entidade nun comunicado.

Baixo o lema ‘Sen coidados non hai vida. Cambiando o sistema, derrubando o patriarcado’, reclamarase que se recoñezan os coidados como “un ben social non valorado” e esixiranse responsabilidades sociais e colectivas na protección do territorio e o medioambiente.

Ademais, este domingo, día 1 de marzo, levará a cabo unha manifestación en Verín (Ourense) para denunciar a “violencia institucional exercida durante meses contra as mulleres da comarca” mediante o peche da sala de partos e as urxencias pediátricas do hospital da localidade. Así, denunciouse que se tomou esta “decisión patriarcal” por atender a “criterios políticos e económicos”.

Deste xeito, Galegas 8M quere solidarizarse coa “loita” realizada polas cidadás da localidade ourensá contra a “privatización” e a “precarización” dos servizos públicos sanitarios.