Xunta e Mancomunidade de Montes de Vigo potencian a recuperación de zonas danadas por incendios con especies autóctonas

O presidente da Mancomunidade de Montes de Vigo, Uxío González, puxo en valor os montes da cidade e avogou por protexelos dado que, ao seu xuízo, son "os máis importantes de Galicia"

O conselleiro do Medio Rural, José González, durante a visita realizada a Zamáns

Un convenio alcanzado entre a Xunta e a Mancomunidade de montes de Vigo, así como con catro comunidades de montes do municipio, permite levar a cabo os traballos de recuperación e potenciación de Zamáns e Santo Andrés de Comesaña, mediante os que se repoboarán con especies autóctonas e protexeranse dos danos que poida ocasionar o gando.

Así o detallou o conselleiro do Medio Rural, José González, durante unha visita realizada a Zamáns, onde se plantarán 1,6 hectáreas de frondosas e catro peches protectores de masa de piñeiro cunha superficie de 69 hectáreas. Esta actuación realízase en paralelo aos traballos de recuperación que levan a cabo en Santo Andrés de Comesaña para reforestar esta zona con case 11 hectáreas de piñeiro e cinco de hectáreas de frondosas, así como para restaurar pistas danadas polo lume.

En concreto, o custo destas actuacións, iniciadas en 2019, ascende a 250.000 euros. Neste momento, desenvólvese a primeira fase dos traballos, que se espera que finalicen este ano. Ademais, o convenio permitirá destinar 1,2 millóns de euros a actuacións de recuperación das zonas de Valadares e Coruxo, que se adxudicarán antes deste verán e que se espera que conclúan en 2021.

OBXECTIVOS

A este respecto, o conselleiro sinalou que estes traballos buscan “protexer un monte multifuncional” e garantir a súa sustentabilidade “económica e medioambientalmente”. Así, incidiu na importancia dunha “cooperación institucional” que permita levalos a cabo.

Así mesmo, o presidente da Mancomunidade de Montes de Vigo, Uxío González, puxo en valor os montes da cidade e avogou por protexelos dado que, ao seu xuízo, son “os máis importantes de Galicia”. Tamén avanzou que, mediante o convenio alcanzado xunto ao Goberno galego, traballarase para crear unha zona que “protexa ao monte, ademais das vivendas”, dos incendios forestais.