A Eurocámara dá luz verde ao acordo comercial con Vietnam, que protexe a DO Rías Baixas

Unidas Podemos votou en contra porque considera que está deseñado "á medida das grandes multinacionais e non dos intereses da cidadanía".

Viño Rías Baixas / doriasbaixas.com

O pleno do Parlamento Europeo deu este mércores luz verde ao acordo de libre comercio con Vietnam, que elimina case a totalidade dos aranceis co segundo maior socio do bloque comunitario na Asociación de Nacións do Asia Sudoriental (Asean) e cuxa ratificación perigou polas dúbidas respecto dos estándares laborais e o respecto dos Dereitos Humanos neste país.

A desaparición gradual de case todos os aranceis no comercio con Vietnam prevé tamén a protección de 169 produtos europeos emblemáticos, entre eles varios de interese para España, como denominacións de orixe do viño tales como Rías Baixas, os cítricos valencianos, o azafrán e queixo manchegos, a denominación de aceite de oliva e outros viños.

Esta protección supón o recoñecemento de que se trata de produtos cuxa denominación está protexida e, por tanto, non se poderían comercializar en Vietnam outros produtos que, por exemplo, baixo unha etiquetaxe determinada poidan facer pensar que proceden de Rías Baixas se non o son.

Ante as críticas dalgúns sectores pola vulneración de dereitos fundamentais no país asiático, o pacto foi ratificado por unha ampla maioría de 401 votos a favor, 192 en contra e 40 abstencións.

O acordo inclúe salvagardas vinculantes en materia de protección do clima, dereitos laborais e Dereitos Humanos que permitirían a súa suspensión en caso de violacións graves. Os eurodeputados, ademais, esperan que este novo marco de relación axude a protexer o medio ambiente e alentar o progreso social no país.

Con respecto á protección dos investimentos, as partes acordaron crear un sistema de tribunais de investimentos similar ao que o bloque comunitario pactou con Canadá para o CETA e ao que quería pór en marcha con Estados Unidos no caso do TTIP.

As compañías europeas poderán tamén participar nas licitacións públicas convocadas polo goberno vietnamita e varias cidades, entre elas Hanoi.

PODEMOS VOTA EN CONTRA

A delegación de Unidas Podemos na Eurocámara votou en contra da ratificación do acordo por considera que está deseñado “á medida das grandes multinacionais e non dos intereses da cidadanía”.

Tamén critica que con este pacto a UE pase por alto a “persecución de opositores políticos, activistas e xornalistas en aras dun beneficio comercial baseado na competencia desleal entre traballadores europeos e vietnamitas”.

Non existe ningunha garantía de que este acordo vaia servir para implementar melloras democráticas ou laborais en Vietnam porque non hai mecanismos de presión unha vez se asinou”, alertou a eurodeputada María Eugenia R. Palop.

DEIXAR UN COMENTARIO

Please enter your comment!
Please enter your name here