A sede da Deputación de Pontevedra en Vigo, en pleno Casco Vello, acollerá nos próximos meses diversos eventos culturais, con especial atención á creación feminina e á reivindicación das mulleres artistas, cunha programación de actos que foi presentada este luns pola presidenta do organismo provincial, Carmela Silva.
Así, avanzou que xa este martes se celebrará o Día das Mulleres na Ciencia, cun encontro do Colexio de Enxeñaría no que se abordará a presenza das mulleres nas denominadas carreiras STEM (de ciencias, tecnoloxía, enxeñaría e matemáticas).
O próximo 21 de febreiro, a sede viguesa da Deputación acollerá unha “pasarela do traxe galego” tradicional, organizada pola asociación etnográfica Sete Espadelas, e que se complementará cunha mostra das artesás Elena Ferro (‘zoqueira’) e Paula Ojea (ceramista).
A programación de febreiro culminará, o próximo 24, Día de Rosalía de Castro, cunha ‘visita’ da escritora que, acompañada polo pintor e escritor de finais do século XIX e principios do XX, Modesto Brocos, darán un ‘paseo’ polo barrio histórico de Vigo e ofrecerán unha representación na sede da Deputación.
REIVINDICACIÓN DA IGUALDADE
Xa no mes de marzo, farase especial énfase na reivindicación da igualdade e da loita contra as violencias machistas aínda que, como recalcou Carmela Silva, a institución provincial “reivindica a igualdade os 365 días do ano”.
O 3 de marzo inaugurarase a exposición ‘Sempre marzo’, cunha selección de obras de 33 creadores, extraídas do libro do mesmo título e coordinado polo poeta Yolanda Castaño. Trátase dunha mostra de pinturas, gravados e esculturas, complementados con 12 poemas manuscritos de autoras como María Xosé Queizán, Marilar Alexandre, Olga Novo ou Ana Pedreira, entre outras.
O 4 de marzo celebrarase unha xornada de ‘Letras en feminino’ para “visibilizar a revolución das mulleres na literatura galega”.
Os días 5,6 e 9 de marzo, a sala de proxeccións Dorotea Bárcenas da sede da Deputación acollerá as proxeccións dos filmes ‘Onaga Girls’, ‘Sonita’ e varias curtas, todas obras que viran ao redor das mulleres e a loita pola igualdade.
MÁIS EXPOSICIÓNS
O 11 de marzo iniciarase outra exposición, comisariada por Rosa Sarmiento, baixo o título ‘Muller por Muller’, que será a primeira gran mostra que se poida ver nesta sede, e contará con fondos de coleccións públicas e privadas da provincia, e servirá para reivindicar as mulleres creadoras.
Xa en abril, a sede será escenario dunha mostra singular: unha selección de carteis elaborados e enarborados por participantes nas manifestacións que se celebran con motivo do 8M, Día Internacional da Muller. Tamén poderá verse outra exposición “moi especial” sobre a escritora María Xosé Queizán, cunha mostra de obxectos que foi recompilando ao longo da súa vida.
E, entre marzo e abril, dependendo das condicións climatolóxicas, poderá verse no exterior da sede a mostra ‘O vento nas velas’, con fotografías de Xurxo Lobato.
FORMACIÓN
Por outra banda, a presidenta da Deputación lembrou que, ademais de retomar as actividades do programa SmartPeme, o organismo provincial facilitará formación en Vigo para a inserción laboral.
Así, durante as próximas dúas semanas realizarase o proceso de selección para participar en 11 itinerarios de formación e inserción (en áreas como hostalaría, dinamización e tempo libro, ou socorrismo) ao amparo do programa Labora 2020, que se impartirán a partir de marzo. Unhas 800 persoas beneficiaranse desta actividade en toda a provincia.
Finalmente, Carmela Silva insistiu en que, tal e como se anunciou cando se abriu a sede da Deputación na cidade olívica, dita sede pretende ser un espazo “aberto á cidadanía” e os seus representantes, polo que se sucederán os encontros e actividades organizados por diferentes asociacións e colectivos que solicitaron dispor de espazos.
