O portavoz de SOS Sanidade Pública na área de Vigo e delegado de CIG-Saúde na zona, Manuel González Moreira, chamou a manifestarse este domingo en Santiago ante a “ocultación” de datos de listas de espera realizada polo Sergas.
Tras repartir en Vigo folletos informativos sobre a marcha convocada en defensa da sanidade pública, denunciou que os datos achegados pola Consellería de Sanidade “non contabilizan” as persoas incluídas na lista non estrutural, é dicir, os pacientes aos que se lles ofertou ser intervidos cirurxicamente nun hospital privado e o rexeitaron.
Ademais, o portavoz da plataforma na área de Vigo asegurou que as listas de espera do Sergas tampouco reflicten as probas “que quedan nun caixón” despois de que se indique aos pacientes “que xa serán chamados” para realizalas. Así, reprobou que o sistema aplicado “permita que as xestoras de sanidade pública fagan trampas contables” neste sentido e lamentou que a normativa legal non o impida.
Nesta liña, González Moreira asegurou que, no caso da área de Vigo, se derivan intervencións (cirúrxicas) ao Hospital Povisa “a maiores” do concerto do que este centro dispón co Sergas e afirmou que un investimento diferente destes fondos podería redundar nunha “mellor atención (sanitaria)”.
Así mesmo, insistiu nos efectos das mobilizacións ao lembrar que “permitiron” a “reapertura” do paridoiro de Verín. Por iso, recalcou a necesidade de celebrar a convocada en Santiago ante a “falta de profesionais” e o “déficit de estrutura sanitaria” que presentan os centros de Vigo debido a que “se baleiraron co traslado de recursos ao Hospital Álvaro Cunqueiro” tras a súa apertura.
CONDICIÓNS LABORAIS
En relación ás condicións dos profesionais, González Moreira denunciou a súa “precarización”, o que, ao seu xuízo, afecta á calidade da atención sanitaria. Así, sinalou que as contratacións realizadas recentemente polo Sergas “son insuficientes” e incidiu en que unha “aposta” pola Atención Primaria “ten que pivotar sobre os recursos humanos”.
Por ese motivo, o portavoz da plataforma na área de Vigo remarcou a necesidade de abordar as “necesidades” dos profesionais e reducir as súas cotas de pacientes para mellorar o servizo.
Nese sentido, achacou a falta de profesionais desempregados que poidan cubrir vacantes a que os titulados “marchan porque lles ofrecen mellores condicións noutros lugares”. Ante esta situación, avogou por que “se convoquen prazas como interinidades” e, posteriormente, “oposicións reguladas”, xa que, na súa opinión, se se ofrecen “contratos de calidade” e se melloran as condicións laborais os profesionais optarán por traballar no sistema público galego.
EVENTO EN VIGO
A presidenta da xunta de persoal da área Sanitaria de Vigo e secretaria xeral da Federación de Sanidade e Sectores Sociosanitarios de CC.OO. na provincia de Pontevedra, María José Diéguez, anunciou que a Plataforma SOS Sanidade Pública celebrará un evento na cidade olívica para instar á cidadanía a sumarse á marcha convocada este domingo.
En concreto, o acto informativo, que se celebrará este xoves na Casa da Galega da Cultura ás 19,00 horas, contará coa participación dun médico de Atención Primaria, unha matrona do Hospital de Verín, María José Diéguez e Manuel González Moreira.
