(Vídeo) PP e PSOE coinciden no apoio ao Plan Anual Normativo de 2020 do Concello de Vigo

O pleno instou ao Goberno galego a licitar as obras de ampliación do Instituto Feiral de Vigo (Ifevi).

A corporación municipal de Vigo aprobou este mércores no pleno deste mes o Plan Anual Normativo de 2020, que inclúe ordenanzas relacionadas co medioambiente, a iluminación pública, o abastecemento de auga, obras, limpeza e administración electrónica.

Así, a aprobación foi realizada cos votos a favor dos grupos municipais Socialista e do Partido Popular e a abstención dos concelleiros de Marea de Vigo e o BNG. Sobre este punto, o portavoz do Grupo Municipal Socialista, Carlos López Font, puxo en valor que fose posible elaborar este documento, ao que se dará desenvolvemento normativo ao longo deste ano, grazas ao traballo conxunto realizado por varios departamentos do goberno local.

Mentres, o portavoz do Grupo Municipal do Partido Popular, Alfonso Marnotes criticou a cantidade de ordenanzas incluídas –que ascenden a case unha vintena–e cuestionou que sexa posible redactalas e aprobalas todas durante este ano. Ademais, chamou a realizar unha revisión das normas municipais ao considerar que se atopan “obsoletas”.

Abel Losada © Miguel Nuñez

Pola súa banda, o portavoz do Grupo Mixto, no que se integra Marea de Vigo, Rubén Pérez, apuntou á necesidade de incluír no plan unha ordenanza reguladora de baremos para conceder subvencións públicas e o edil do BNG, Xabier P. Igrexas, avogou por presentar un menor número de normas e por que estas sexan máis claras.

OUTRAS MOCIÓNS

Así mesmo, avalouse reflectir o cambio de natureza xurídica do antigo edificio do Reitorado a patrimonial no inventario municipal de bens inmobles, segundo resolveuse por acordo plenario en decembro.

Así, co único apoio dos concelleiros do Grupo Municipal Socialista e o rexeitamento de toda a Oposición, incluíuse esta modificación que persegue facilitar que o edificio sexa adquirido pola Zona Franca para instalar a súa sede. Mentres, o inmoble anexo acollerá un centro de negocios.

Pleno do Concello de Vigo, con Xabier P. Igrexas en primeiro plano e Rubén Pérez, da Marea de Vigo, en terceiro/ @Miguel Núñez

Adicionalmente, a corporación municipal aprobou unha moción presentada polo Grupo Mixto para pedir o apoio do pleno á mobilización en defensa da sanidade pública que se celebrará en Santiago o 9 de febreiro.

Tamén se apoiaron mocións do Grupo Municipal Socialista para insta á Xunta a dotar a Vigo do número necesario de prazas en residencias públicas e a subscribir un convenio de colaboración para establecer a delegación do Centro Galego de Arte Contemporánea de Galicia (CGAC) na cidade.

IFEVI

Marnotes © Miguel Nuñez

Ademais, o pleno instou ao Goberno galego a licitar as obras de ampliación do Instituto Feiral de Vigo (Ifevi) en paralelo á tramitación da aplicación da Lei de medidas en materia de proxectos públicos de urxencia ou de excepcional interese, necesaria para acometer o proxecto. Deste xeito, segundo detallou a concelleira de Urbanismo, María José Caride, búscase que ambos os trámites se solapen para dar unha maior celeridade ao proceso.

Así foi o tenso debate entre Alfonso Marnotes, do PP, e María José Caride, do PSOE, sobre esta cuestión: