Axentes da Policía Nacional detiveron a un home de 79 anos con antecedentes por causar danos en vehículos estacionados na zona da Dobrada após golpear a unha muller nunha área peonil da cidade de Vigo.
Segundo informou a Policía Nacional, o detido por un delito de danos é un home de 79 anos de idade de nacionalidade española e con domicilio en Vigo, que conta con 11 antecedentes.
Os feitos ocorreron á primeira hora da tarde cando se recibiu unha chamada na Sala Operativa do 091 na cal informaban de que un home tentaba golpear a unha muller na parte peonil da rúa Urzáiz.
Por iso, unha dotación policial acudiu e foi requirida por unha nova, a cal lle indicou que vira como un home de avanzada idade golpeaba a unha muller na parte peonil da rúa Urzáiz e fuxía pola rúa Aguia.
Inmediatamente chamou á Policía e tentou seguilo, “descubrindo estupefacta como sacaba un obxecto punzante do seu peto e raiaba varios vehículos estacionados na rúa“, subliñou á Policía. Ademais nalgún deles puido observar que tentaba forzar os tiradores das portas e manipular as fechaduras.
Após facilitar unha breve descrición aos axentes, estes deron aviso ao resto de efectivos e comprobaron rúas próximas, onde localizaron a un home cuxas características coincidían co que buscaban. Ademais, comprobouse os vehículos estacionados e descubriron que polo menos catro deles tiñan danos nas súas fechaduras e raias nos laterais das súas carrozarías.
Mentres localizaban aos propietarios dos vehículos para informarlles do sucedido e dos trámites a seguir, apareceron outro tres veciños que manifestaron que tamén sufriran danos nos seus turismos.
BARRIO “ATEMORIZADO”
Así mesmo, a Policía destacou que este “vándalo da terceira idade” tiña “atemorizado ao barrio”, xa que non só actuaba contra os vehículos, senón “contra portais de edificios e persoas”. Por todo iso, procedeuse á detención deste home por un delito de danos, así como ao seu posterior traslado a dependencias policiais.
Ao realizar unha comprobación das bases de datos policiais confirmouse que o septuaxenario “xa tiña 11 antecedentes policiais anteriores, varios deles por feitos similares ao descrito“, subliñou a Policía.
A investigación foi levada a cabo por axentes do Grupo de Atención ao Cidadán, pertencente á Brigada de Seguridade Cidadá da Comisaría de Vigo-Redondela. O detido e todo o actuado foi posto a disposición do xulgado de Instrución de Vigo en funcións de garda.
