InicioSucesosO balance final da explosión de Tui: polo menos 692 afectados, 26...

O balance final da explosión de Tui: polo menos 692 afectados, 26 casas destruídas e 92 con danos

O Concello indica que quedan catro persoas hospitalizadas, entre eles os dous menores fillos do matrimonio falecido

PUBLICADO O

O Centro de atención aos afectados pola explosión de material pirotécnico ocorrida o pasado mércores na parroquia de Paramos, en Tui, rexistrou un total de 692 persoas afectadas e abriu 325 expedientes de incidencias até as 13:00 horas deste luns.

Así o comunicou o Concello de Tui, que tamén indicou que até o momento contabilizáronse 26 casas destruídas completamente, 49 coa estrutura “moi afectada” e 43 que presentan “unha gran afectación na cuberta”.

Tal e como explicou o Consistorio, unha vintena de empregados municipais atenden aos afectados no Centro de Formación local, onde se centralizan estes labores de atención e asesoramento.

 
Entre outras cuestións, o persoal dos servizos sociais traballa para recolocar ás familias que non poden regresar ás súas casas. Así, catro delas trasladaranse nas próximas horas a unha vivenda en aluguer, e continúan os labores para atopar outros domicilios que cumpran as necesidades do resto de familias (membros da unidade familiar, menores escolarizados, disposición de vehículo, etc.).

Así mesmo, no lugar traballa o gabinete urbanístico local (composto por dous aparelladores e dous auxiliares administrativos), equipo que este luns asistiu a 21 persoas en relación aos trámites a levar a cabo para reparar os seus inmobles.

As autoridades e os escombros / Miguel Núñez

Ao persoal municipal súmanse tres traballadores sociais da Deputación de Pontevedra, aos que este martes se unirán dous aparelladores do servizo de arquitectura, un técnico de xestión económica e un experto en seguros.

Ademais, por parte da Xunta incorporarase un técnico do Instituto Galego de Vivenda e Solo para informar as liñas de axudas habilitadas pola Administración autonómica. Así mesmo, catro persoas voluntarias colaboran en diversas tarefas.

CATRO PERSOAS NO HOSPITAL

No mesmo comunicado, o Concello transmitiu que o alcalde, Carlos Vázquez Padín, visitou este domingo ás catro persoas que continúan ingresadas en centros hospitalarios. Alí trasladoulles o apoio e solidariedade da corporación, e preguntoulles polas necesidades que terán cando sexan dados de alta.

Entre as ruínas / Miguel Núñez

Entre as persoas que seguen ingresadas atópanse os dous menores fillos do matrimonio que faleceu ao resultar sepultos polos cascallos da súa casa após a explosión. Os menores están baixo a tutela do xerente do Hospital Álvaro Cunqueiro e a Xunta “estuda a mellor fórmula” para decidir quen se fará cargo deles en canto reciban o alta.

ZONA CERO

Doutra banda, o Concello indicou que no barrio de Torre, zona cero da explosión, o arquitecto municipal e operarios do servizo de obras continúan cos traballos de avaliación e reparación de infraestruturas.

A maiores, o Concello avanzou que solicitará aos peritos xudiciais que están a avaliar os danos en todas as casas que realicen tamén unha valoración económica, para poder cuantificar os danos.

 
Neste sentido, o Centro de atención aos afectados chamou ás persoas que sufriron danos nos seus vehículos e que non os rexistraron no seu expediente de incidencias, para que volvan acudir a este centro para engadir eses danos e así formen parte da listaxe de afectados na tramitación que terán que facer coa aseguradora.

Este centro de atención sitúase no Centro de Formación do Concello de Tui en Guillarei, e habilitouse tamén o email afectadostui@concellotui.org e o teléfono 986.603.949. Ademais, Abanca abriu unha conta para recibir doazóns, das que Vázquez Padín asegurou que “o 100% será para axuda aos afectados”.

ÚLTIMAS

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...

Poñen marcha un servizo de aluguer de bicis eléctricas en Vigo, dispoñibles en sete aparcadoiros da cidade

A compañía Welgood puxo en marcha un servizo de aluguer de bicicletas eléctricas en...