Dúas persoas tiveron que ser trasladadas a un centro hospitalario ao intoxicarse co fume dun pequeno incendio que se orixinou na súa vivenda de Vigo.
Dos feitos informou o 112 Galicia, que foi alertado sobre o sucedido preto das 11,00 horas deste domingo. Nese momento, os servizos sanitarios tiveron que trasladar ao hospital a estas dúas persoas que presentaban síntomas de intoxicación.
Ao parecer, todo se debeu a unha tixola que comezou a arder e afectou á campá extractora da cociña. Cando chegaron os Bombeiros de Vigo para atallar o incendio, xa estaba extinguido e só tiveron que ventilar a estancia para eliminar o fume.
Pola súa banda, os profesionais de Urxencias Sanitarias de Galicia-061 trasladaron as dúas persoas desde a vivenda situada en Travesía de Vigo ao Hospital Álvaro Cunqueiro.
