Rodman nega que a filial de Panamá sexa unha ‘offshore’ e repite que Espinosa descoñecía que figurase nela

A empresa prevía que a sociedade se disolvería "de oficio" por ausencia de movementos e balance "cero".

Elena Espinosa presidindo o pleno / © Miguel Núñez.

O estaleiro Rodman Polyships negou que crease unha sociedade ‘offshore’ en Panamá, na que a exministra e actual concelleira socialista de Vigo, Elena Espinosa, figuraba como tesoureira, e recalcou que dita empresa era unha “filial” para negocios “puntuais” nese país, á vez que insistiu en que tanto o presidente da empresa, Manuel Rodríguez, como a propia Espinosa (que foi directiva no estaleiro), descoñecían que ela figurase na estrutura desa filial.

Así o trasladaron fontes da empresa despois das críticas do PP e do anuncio de que deputados e senadores ‘populares’ preguntarán nas Cortes por esa suposta participación de Elena Espinosa nunha sociedade situada nun paraíso fiscal.

Respecto diso, Rodman Polyships puntualizou que “nunca” creou unha sociedade ‘offshore’ en Panamá, senón unha filial denominada Rodman Polyships International, rexistrada en 1995, con motivo das negociacións comerciais con ese país, así como con Surinam.

O propio nome da filial, sinalou, denota que había unha “nula intención de ocultar” esa medida que, por outra banda, lembrou o estaleiro, “non é en absoluto ilegal, sempre que se comunique á Facenda española, como Rodman Polyships fixo”. De feito, abundou, tratouse de negocios auditados e suxeitos a inspección das autoridades tributarias españolas.

O estaleiro tamén recalcou que Rodman Polyships International creouse “de forma puntual” para eses negocios e que, desde a execución dos mesmos, non volveu ter movementos. Segundo precisaron, os seus asesores legais en Panamá indicáronlles que, unha vez que non había movemento algún e o balance era “cero”, o propio goberno panameño “de oficio” disolvería esa filial.

NIN RODRÍGUEZ NIN ESPINOSA SABÍANO

Por outra banda, Rodman insistiu en que nin o presidente do grupo, Manuel Rodríguez, nin a propia Elena Espinosa, sabían que ela figuraba na estrutura do filial “tres anos despois, momento no que se produciu un cambio de tesoureiro na filial, por mor da súa saída da matriz”.

De feito, a empresa recalcou que ese cambio foi levado a cabo polo seu representante legal en Panamá, pero “sen presenza de ningunha figura executiva” de Rodman.

“Ningún documento nese sentido conta coa firma de ningún dos dous”, subliñaron desde o estaleiro, e engadiron que Elena Espinosa “nunca tomou posesión como tesoureira desta filial, nin exerceu como tal, nunca tivo poderes na mesma, nin tan sequera foi convocada a reunión algunha en ningún momento”.