A nova incubadora de alta tecnoloxía para o sector da automoción High Tech Auto (HTA), situada en Vigo, abriu a súa primeira convocatoria para apoiar o desenvolvemento de iniciativas innovadoras de face á súa saída ao mercado e a súa posterior consolidación.
Segundo trasladaron en senllos comunicados a Xunta e a Zona Franca de Vigo, impulsoras da iniciativa, cofinanciada con fondos europeos, o prazo para a presentación de proxectos foi aberto este venres e finalizará en febreiro de 2020.
Esta incubadora, situada nas instalacións da Zona Franca en Bouzas, busca complementar o traballo desenvolvido pola Business Factory Auto (BFAuto) dun modo previo e centrarase en proxectos do sector da automoción e a súa industria auxiliar. Así, as ideas ou tecnoloxías serán apoiadas e aceleradas “desde a súa semente” para “construír un modelo de negocio de innovador ao redor delas” enfocado na súa saída ao mercado e a súa posterior consolidación.
Deste xeito, a HTA aspira a complementar o ámbito da innovación da área e favorecer a transferencia de tecnoloxía desde o ámbito académico e tecnolóxico ás empresas co obxectivo de consolidar a Industria 4.0.
Para iso, os proxectos participantes contarán con servizos de apoio que lles permitirán transformar os seus modelos de negocio, así como con espazos para a incubación, un laboratorio de fabricación e servizos dixitais e tecnolóxicos de automoción.
