O sindicato CIG denunciou este venres a súa exclusión do Consello de Administración do Porto de Vigo, a pesar de que esta central gañou as eleccións sindicais na Autoridade Portuaria e, segundo aseguraron, iso dálles dereito a ter un asento de vogal nese órgano.
Responsables e delegados do sindicato concentráronse ás portas do edificio de Sesións do Porto, onde se celebrada cada mes a reunión do Consello, para protestar por esta exclusión, e mesmo a persoa designada pola CIG como representante nese órgano, Anxo Igrexas, tratou sen éxito de participar nesa reunión do consello portuario.
Segundo explicou a central nacionalista, tras obter a maioría de votos nas eleccións sindicais de xullo pasado na Autoridade Portuaria, teñen dereito a ter un representante no Consello de Administración pero, transcorridos catro meses, non se fixo efectivo o cesamento do anterior representante sindical no Consello (de CC.OO.) nin a entrada do novo vocal, que sería da CIG.
Neste tempo, presentou escritos no Porto e tamén ante a Consellería do Mar, pero a situación non cambiou, polo que anunciaron que, tras consultar cos seus servizos xurídicos, emprenderán accións legais.
RESPOSTA DO PORTO
Cuestionado acerca desta protesta, na rolda de prensa posterior á reunión do Consello de Administración, o presidente do Porto, Enrique López Veiga, tachou de “intolerable” que un representante da CIG “se autonombre” vocal e tente participar na reunión.
Segundo lembrou, o Porto non designa aos membros do Consello, senón a Xunta de Galicia pero, en todo caso, advertiu de que o feito de que a CIG gañase as eleccións sindicais “non implica automaticamente que entre no Consello”.
A ese respecto, matizou que o vogal sindical deste órgano pertence á central que sexa “maioritaria no ámbito portuario”, o que inclúe, ademais do propio Porto, a empresas e outras entidades que forman parte da comunidade portuaria. “E na comunidade portuaria, a CIG non é o sindicato maioritario nin moito menos, están por diante CC.OO. e UGT”, engadiu.
“O que non é de recibo é que se planten aquí, tenten entrar, e fagan unha manifestación sen anuncialo. Polas malas non; intimidarme non; xa deberían saber que iso non funciona”, advertiu López Veiga, quen lembrou que “isto non é Bildu nin a ‘kale borroka‘”.
