As persoas refuxiadas e as súas familias son “aínda máis vulnerables” ante problemas “estruturais” como a falta de asequibilidade da vivenda ou as dificultades de acceso ao mercado laboral e a súa precarización.
Así se desprende do estudo ‘Unha casa como refuxio: Itinerarios residenciais das persoas solicitantes de protección internacional en Madrid e Vigo’, que foi presentado este venres na cidade olívica pola Asociación Provivienda.
Neste sentido, os resultados da análise sinalan que ante esta situación, os refuxiados experimentan un “reto engadido”, nalgúns casos por carecer de competencias idiomáticas ou por non ter unha rede familiar de apoio comparables ao resto da poboación.
Desta maneira, Provivienda explicou que “aínda que as primeiras fases do sistema de acollida responden as necesidades das persoas aloxadas”, os problemas comezan a presentarse na segunda fase. “Conforme as persoas refuxiadas gañan autonomía, perden calidade de vida”, lamentou.
“Procesos como un cambio de vivenda ou de barrio poden ser desestabilizadores para os logros e redes que a persoa puidese xerar. Se queremos que o dereito de asilo e refuxio sexa un compromiso asumido por toda a sociedade, necesitamos que a cidadanía se comprometa a construír unha contorna de acollida e inclusión, sen permitir a existencia de prexuízos ou de procesos de exclusión”, reivindicou dita ONG, que en 2018 acolleu en Vigo oito homes de entre 18 e 32 anos, de nacionalidade nixeriana, que viaxaban a bordo do buque ‘Aquiarius’.
RECOMENDACIÓNS
Entre as recomendacións que propón a asociación atópase a de levar a cabo unha Política de Vivenda Alcanzable que “abarque desde a integralidade os problemas de vivenda estruturais que afectan en maior medida á poboación vulnerable como as familias refuxiadas”.
“Tamén debe abordarse unha maior personalización e flexibilidade no sistema de acollida e integración das persoas refuxiadas, que permitan adaptar os apoios ás necesidades de cada persoa-familia así como ter un efecto de contrapeso ante as barreiras estruturais”, subliñou Provivienda.
Noutra orde de cousas, solicitaron unha mellora no desempeño do Sistema de Protección Internacional, centrándose en “avanzar nunha maior coordinación legal e administrativa no relativo á documentación das persoas solicitantes”, para así “garantir o acceso a dereitos recoñecidos como o emprego, a vivenda, a educación ou a saúde”.