Condenan o Sergas a pagar 30.000 euros por falta de información a unha paciente cunha sonda de gastrostomía

Un xulgado de Santiago de Compostela deu a razón á familia ao entender que a paciente viguesa foi sometida a varias intervencións médicas "invasivas" sen que houbese consentimento informado.

Hospital Álvaro Cunqueiro / Sergas

Un xulgado de Santiago de Compostela estimou parcialmente un recurso interposto por unha paciente de Vigo, e obrigou ao Sergas a indemnizar esta muller e a súa familia en 30.000 euros, por considerar que a información que se lles trasladou acerca de varias intervencións médicas invasivas ás que foi sometida foi “insuficiente”.

Segundo informaron fontes do despacho de avogados de Cipriano Castreje, que representou á familia afectada, o Sergas rexeitou, mediante unha resolución do pasado 11 de setembro de 2017, a reclamación patrimonial presentada pola familia, que alegaba que non se realizou o consentimento informado nunha operación de colocación dunha sonda de gastrostomía. Tras esta decisión do Sergas, a afectada presentou recurso contencioso administrativo.

Agora, un xulgado de Santiago de Compostela estimou en parte ese recurso, e deu a razón á familia, ao entender que a paciente, que padece problemas de saúde que a fan dependente, foi sometida a varias intervencións médicas “invasivas” sen que houbese consentimento informado.

En concreto, a familia –que está a estudar recorrer o fallo– fixo referencia á falta de consentimento para, ademais doutras intervencións, a colocación desa sonda de gastrostomía, e sinalou que non se comprobou se dita sonda estaba ben colocada.