A realidade virtual aplicada á formación na industria chega a Galicia

O BDM de Ludus presentou en Vigo este sistema de formación, no III Congreso Internacional sobre Prevención e Seguridade Industrial 4.0.

Ricardo Pascual, da empresa Ludus, fai unha demostración do uso da realidade virtual na formación na industria, no III Congreso sobre Prevención e Seguridade Industrial celebrado en Vigo. ÓSCAR GARCÍA

A realidade virtual aplicada á formación e o adestramento de traballadores “xa non é o futuro, é o presente” e chegou a Galicia, da man de Telefónica e da empresa Ludus, co desenvolvemento de proxectos para Estrella Galicia e Finsa.

Nunha entrevista a Europa Press, o xerente de desenvolvemento de negocios (BDM) de Ludus, Ricardo Pascual, sinalou que cada vez son máis as empresas que apostan pola realidade virtual como ferramenta de formación para os seus traballadores, aínda que é certo que se trata dun recurso que, de momento, non está ao alcance de todas as compañías.

Por iso, explicou, son as grandes compañías as que están a abrir camiño na aplicación da realidade virtual pero, do mesmo xeito que ocorreu con outras tecnoloxías, acabará sendo incorporada tamén polas pequenas e medianas empresas.

Aínda que son as grandes empresas as que poden permitirse investir neste recurso, este experto indicou que a aplicación da realidade virtual na industria non ten moitas diferenzas con respecto á aplicación doutras tecnoloxías. “Ao principio todas teñen un prezo relevante, e iso pode ser unha barreira para as pemes, pero a maior parte das empresas, independentemente do seu tamaño, teñen nos seus plans investir en realidade virtual, sexa máis temperán ou máis tarde”, apostilou.

O custo dun proxecto deste tipo rolda os 50.000 euros, pero é un prezo aproximado, xa que depende das características de cada empresa, do que demande a nivel de formación, do deseño do programa, etc.

SIMULACIÓNS EN PRODUCIÓN E MANTEMENTO

Pascual explicou que Ludus desenvolve simulacións para formación en industria, fundamentalmente en procesos de produción e mantemento, recreando as contornas de traballo, xa sexa o interior dunha planta ou o exterior, cando a actividade se produce en zonas externas. A través dunhas lentes de realidade virtual, os traballadores van aprendendo os pasos que deben dar nun determinado proceso.

“Está demostrado que aprender facendo é moito máis efectivo que aprender a través dunha formación tradicional, con manuais ou vídeos, porque os empregados están a vivir e interiorizando os coñecementos”, explicou o BDM de Ludus.

Ademais, indicou, unha das principais vantaxes destas simulacións é que se incorporan aspectos de seguridade e prevención de riscos laborais. “O adestramento cos perigos e riscos que se inclúen na realidade virtual, serve para poder eliminalos no mundo real”, apostilou.

AUTOMOCIÓN, QUÍMICA E ENERXÍA

Ricardo Pascual sinalou os sectores da automoción, a química e a enerxía como as industrias que, na actualidade, máis están a apostar pola formación a través de realidade virtual. De feito, no ámbito da automoción, Ludus traballa xa coa planta de Ford en Valencia, e con provedores como Plastic Omnium, Gestamp ou Faurecia, que teñen plantas en Galicia.

Así, augurou que, no caso desas auxiliares de automoción, a realidade virtual “acabará chegando” tamén ás factorías galegas, e incidiu en que “hai un gran grao de aceptación” destas tecnoloxías por parte das empresas. “Todas o ven claro, pero os prazos de implantación dependen do orzamento de cada unha”, reiterou.

Segundo explicou, ademais dos programas de formación, a realidade virtual é unha ferramenta útil no deseño de instalacións. Deste xeito, cando unha empresa quere construír unha nova planta ou ampliar as dotacións que xa ten, pode planificar a localización da súa maquinaria, dos postos de traballo, os itinerarios, etc., grazas á simulación, e así, adaptar os espazos ás necesidades da produción.

VANTAXES

Ricardo Pascual recalcou que, fronte aos sistemas tradicionais de formación de traballadores, a realidade virtual ofrece vantaxes significativas: mellora a retención da información e os coñecementos, redúcense os accidentes laborais e os custos de desprazamentos (porque se permite a formación remota).

Este é o futuro, quizá xa o presente, da formación nas empresas. A realidade virtual xa non é unha tecnoloxía emerxente, senón madura, e está implantada nas grandes empresas. É cuestión de tempo que se estenda, porque é o seguinte paso ao ‘e-learning'”, proclamou.

O BDM de Ludus presentou en Vigo este sistema de formación, no III Congreso Internacional sobre Prevención e Seguridade Industrial 4.0, organizado polo Instituto de Seguridade e Saúde Laboral de Galicia (ISSGA), o Consello Galego de Enxeñeiros Técnicos Industriais (CGETI), e a Asociación de Profesionais de Seguridade e Saúde Laboral de Galicia (APROSAL).