A Policía Nacional detivo a dous homes, de 33 e 26 anos de idade, de nacionalidade española e con domicilio en Vigo, como presuntos autores de catro delitos de roubo con forza cometidos en establecementos comerciais da zona de Bouzas. Tal como indicou a Policía nun comunicado, a investigación iniciouse tras unha tentativa de roubo nun restaurante do barrio de Bouzas. Mentres se seguían varias liñas de investigación, tívose constancia doutros dous roubos máis cometidos na mesma zona.
“En todos os casos había un gran número de coincidencias, que fixeron pensar aos investigadores que o autor, ou autores, podería ser a mesma persoa”, destacaron os axentes. Tras analizar as probas, decatáronse de que todos os sucesos mantiñan unhas pautas temporais e de actuación “similares”, ademais de que en todos os casos o botín centrábase en botellas de licores concretos e no diñeiro da caixa ou máquinas.
Xa avanzada a investigación xurdiu outro caso similar, o que permitiu aos axentes porse tras a pista de dous “vellos coñecidos”, polo que se elaborou un dispositivo encamiñado á localización e detención de ambos os homes en diferentes puntos da cidade, tras o que foron detidos na tarde deste xoves.
Unha vez en comisaría tomóuselles declaración e comprobouse que aos detidos constábanlles máis de 22 antecedentes policiais totais, sendo varios deles por feitos similares ao descrito. Ademais, os investigadores non descartan a súa imputación noutras causas que están a ser obxecto de investigación.