O comité de empresa do estaleiro vigués HiJos de J. Barreras confía en que os propietarios da empresa (o accionista maioritario é PMI, filial da petroleira mexicana PEMEX) cheguen a un acordo “esta semana” cos armadores de Ritz Carlton para finalizar o cruceiro e desbloquear a situación.

Así o trasladou, en declaracións aos medios, o presidente do comité, Sergio Gálvez (UGT), quen sinalou que a “folla de ruta” que a propiedade trasladou aos traballadores é precisamente esa: chegar a un acordo con Ritz Carlton acerca de como xestionar os sobrecustos (uns 50 millóns de euros) no cruceiro para renovar a actividade e finalizar o buque.

Gálvez expresou a súa confianza en que, unha vez despexado ese “tapón”, será máis fácil retomar a construción dos dous barcos da armadora Norueguesa Havila, que seguen nas bancadas de Barreras. Segundo apuntou, salvar ese primeiro escollo contribuirá tamén a despexar a situación do accionariado do estaleiro e unha posible venda.

O presidente do comité indicou, así mesmo, que se están producindo “negociacións” para “evitar chegar a concurso de acredores ou á liquidación da sociedade”, e urxiu a que se tomen decisións porque “os tempos xa son agónicos”. “Ten que haber unha aposta decidida porque nos xogamos todos moito. Non só os 200 traballadores de persoal, hai mil empregos directos de auxiliares e outro mil indirectos”, engadiu.

“Non imaxinamos un escenario que non sexa o acordo, pero non podemos esperar tres meses para solucionar isto”, recalcou Gálvez, quen lembrou que o estaleiro Barreras ten unha carteira de pedidos por valor de case 900 millóns de euros.

MOBILIZACIÓNS

O presidente do comité de empresa fixo estas declaracións antes da celebración dunha manifestación, que partiu da entrada principal do estaleiro ata a rotonda da Praza da Industria Conserveira. Varias decenas de traballadores e representantes dos sindicatos CIG, CC.OO. e UGT participaron na marcha, ao berro de “Barreras solución”.

O calendario de mobilizacións continuará o xoves, con outro paro de 11 a 12 horas, mentres que o martes da semana próxima está prevista unha parada de 4 horas. Ademais, os traballadores marcharán en manifestación ata a delegación territorial da Xunta en Vigo.

Nestes momentos, a actividade en Barreras está practicamente paralizada e só unhas decenas de traballadores do estaleiro e dalgunha empresa auxiliar se manteñen nas instalacións para cuestións técnicas, como a supervisión do motor de barco de Ritz Carlton, que “ten que estar a funcionar as 24 horas”.