O goberno municipal de Vigo rexeitou dar licenza directa, pola vía de urxencia, para que a Xunta acometa a ampliación do Instituto Feiral de Vigo (Ifevi), xa que sería “unha gravísima ilegalidade”, e instou a tramitar esa obra ao amparo da lei 3/2016.

Nunha rolda de prensa, o alcalde, Abel Caballero, denunciou que o propio presidente galego, Alberto Núñez Feijóo, pediu ao Concello buscar “unha buraco legal” para poder outorgar licenza directa, como condición para que a ampliación estea lista para Conxemar 2020. “Veu dicirnos que incumpramos as normas, e nesta cidade cúmprense as normas urbanísticas escrupulosamente. Dinos que fagamos algo que acabará nos xulgados“, subliñou o rexedor.

O alcalde rexeitou a fórmula exposta polo titular do Executivo autonómico porque sería “unha gravísima ilegalidade”, que “ningún técnico” asinaría, e advertiu de que “nunca” se viu a un presidente dun goberno “instar a unha administración a incumprir as leis”.

Segundo Abel Caballero, o que realmente se esconde tras esta formulación de Feijóo é que o goberno galego non quere consignar 5 millóns de euros nos orzamentos de 2020 para acometer a ampliación do recinto feiral.

O alcalde propuxo, fronte á posición da Xunta, que, unha vez se teña o anteproxecto da obra, se inicie a tramitación para a aplicación da lei 3/2016. “Pódese facer, claro que sae o calendario”, mantivo Caballero, ante a advertencia do propio Feijóo de que esta alternativa podería ampliar os prazos e impedir que o Ifevi estea ampliado para a próxima edición de Conxemar.

“O primeiro que hai que facer é pór 5 millóns nos orzamentos”, reclamou o alcalde de Vigo, quen esixiu tamén que, unha vez se inicie a tramitación do proxecto pola lei 3/2016, a Xunta “apresure” os prazos que dependen da administración autonómica, sempre dentro da legalidade.

“Eu non lles pido que cometan unha ilegalidade, que respecten os prazos, pero que nos seus trámites internos tarden un día en lugar dun mes. Iso depende da vontade política”, asegurou o rexedor, quen insistiu en que “se pode facer, pero require pór 5 millóns e unha tramitación diligente”, como así a fará o Concello, segundo garantiu.