Común da Esquerda pide a dimisión de Ángeles Vázquez polo seu “fracaso” en vivenda

Antón Sánchez censurou que en todo o 2018 só se iniciasen "12 vivendas" de protección habendo 14.000 persoas solicitantes.

Ángeles Vázquez, conselleira de Medio Ambiente / EP

O deputado do Grupo Común da Esquerda Antón Sánchez esixiu este xoves a dimisión da conselleira de Medio Ambiente e Vivenda, Ángeles Vázquez, polo “fracaso” das súas políticas de vivenda e a súa “falta de vontade para afrontar un problema grave para Galicia”.

Nunha rolda de prensa celebrada este xoves en Vigo, Sánchez censurou que en todo o 2018 só se iniciasen “12 vivendas” de protección e que o programa “estrela” de vivendas baleiras da Xunta só conseguise “adxudicar dúas subvencións en Galicia”.

Todo iso, conforme sinalou, nun contexto no que “hai 14.000 persoas” que demandan en Galicia vivenda protexida. “O Goberno galego está á cola de todo o Estado das políticas de vivida, a Xunta é a máis antisocial”, apuntou.

Así mesmo, o tamén líder de Anova asegurou que os datos da conta xeral da Xunta correspondentes a 2018 revelan que só se executaron “33.000 euros” dos 6 millóns orzamentados para o programa de acceso á vivenda en 2018.

Ademais, o parlamentario do Grupo Común da Esquerda tamén lamentou que a execución do Instituto Galego de Vivenda e Solo (IGVS) se situase no 64%, “deixando sen executar políticas de rehabilitación”.

Por todo iso, o parlamentario autonómico esixiu a dimisión da responsable de Vivenda, a conselleira Anxos Vázquez, a quen atribúe unha “nula vontade” para solucionar o problema.