Banco de Alimentos de Vigo busca 2.000 voluntarios para a Gran Recollida

Leite, aceite, cacao, galletas e conservas de todo tipo, os produtos máis necesitados.

ONG
Banco de alimentos almacen © Miguel Nuñez

A Fundación Banco de Alimentos levará a cabo en toda España os próximos 22 e 23 de novembro a súa VII Gran Recollida de Alimentos, polo que se atopa en proceso de procura de voluntarios. Só en Vigo, son necesarios ata 2.000 persoas para esta acción.

Así o sinalaron este martes nunha roda de presa os responsables da Fundación Provincial Banco de Alimentos de Vigo, quen indicaron que nesta ocasión a recolección de comida adiantouse un fin de semana “para escapar do efecto Black Friday”, xa que o ‘venres negro’ se celebrará a semana seguinte.

“Necesitamos a colaboración de moita xente. Á vista están os resultados, xa que Vigo é dos poucos Bancos de España que conseguiu crecer o ano pasado. Non nos obsesionamos con crecer cada ano pero os alimentos fan falta”, destacou o vicepresidente da Fundación na cidade olívica, Iván Martínez.

Neste sentido, subliñou que para esta recollida, Banco de Alimentos de Vigo pretende incrementar o número de establecementos onde se realizará, pasando de 153 ou 154 ata 160. “Entendemos que é unha forma de que sexa máis factible o crecemento”, apostilou Martínez.

VOLUNTARIOS

O ano pasado, a ONG logrou recadar ata 330.000 quilos de comida, un “éxito” que podería repetirse, polo que serán necesarios ata 2.000 voluntarios para estar presentes non só en Vigo, senón tamén en Pontevedra, en Redondela, no Val Miñor, no Baixo Miño, en Lalín e na comarca do Salnés, entre outras localidades (como cada ano). Ademais, nas mesmas datas todos os Bancos de Alimentos de Galicia, España e Europa levarán a cabo esta recollida.

Entre os alimentos que máis se necesitan, o presidente da fundación, Pedro Pereira, destacou o leite, o aceite, o cacao, as galletas, así como as conservas de todo tipo ou os legumes en botes de cristal. “A partir de aí o que a calquera persoa se lle poida ocorrer”, indicou.

Dentro das boas noticias, Banco de Alimentos de Vigo asegurou que na actualización do seu censo, que reconta a cantidade de persoas que reciben comida, baixou a cifra de 25.000 a 20.000 cidadáns da comarca de Vigo. Así, os seus responsables tamén mostraron o seu orgullo dos 25 anos que cumpriu a fundación na cidade, “que oxalá fosen os últimos”.

Sobre eles, puxeron a énfase non só no pasado, senón no ano actual, que cultivou varios “feitos fundamentais”, como a visita da Raíña Sofía, “un motivo de motivación para os voluntarios”.

RECOÑECEMENTO

Tamén indicaron que este mesmo mércores, día 23, celebraranse en Madrid os premios Espiga de Oro da Fundación Banco de Alimentos, que recoñecen a empresas que colaboran coa ONG. Neles será distinguido Ernesto Badía (Perico), un dos fundadores de Banco de Alimentos de Vigo e “historia viva” da fundación, xa que continúa colaborando.

“É un motivo de orgullo que se lle distinga así”, destacaron. Esta celebración dará paso a unha asemblea extraordinaria, que se realizará o vindeiro xoves en Madrid, para debater sobre “cara a onde enfocar” os Bancos de Alimentos de toda España.